വിവിധതരം ചിക്കൻ രുചികൾ പരീക്ഷിക്കാത്ത ഭക്ഷണപ്രേമികൾ ഉണ്ടാകില്ല. ചിക്കന്റെ വ്യത്യസ്ത രുചിയിലുള്ള ഒരു വിഭവം ഉണ്ടാക്കാം. ചോറിനോ ചപ്പാത്തിക്കോ ഒപ്പം വിളമ്പാം. സാൻവിച്ചിനുള്ള ഫില്ലിങ്ങായും ഉപയോഗിക്കാം.
ചേരുവകൾ
1. ചിക്കൻ, എല്ലില്ലാതെ - 250 ഗ്രാം, കഷണങ്ങളാക്കിയത്
2. സവാള - ഒന്ന്, പൊടിയായി അരിഞ്ഞത്
ഇഞ്ചി വെളുത്തുള്ളി പേസ്റ്റ് - ഒരു വലിയ സ്പൂൺ
പച്ചമുളക് - ഒന്ന്
മഞ്ഞൾപ്പൊടി - കാൽ ചെറിയ സ്പൂൺ
മുളകുപൊടി - അര ചെറിയ സ്പൂൺ
ഉപ്പ് - പാകത്തിന്
3. എണ്ണ - രണ്ടു വലിയ സ്പൂൺ
4. മല്ലിയില - രണ്ടു കപ്പ്
5. മല്ലി - ഒരു വലിയ സ്പൂൺ
കറുവാപ്പട്ട - ഒരിഞ്ചു കഷണം
ഗ്രാമ്പൂ - രണ്ട്
വെളുത്തുള്ളി - രണ്ട് , മൂന്ന് അല്ലി
പാകം ചെയ്യുന്ന വിധം
ചിക്കൻ കഷണങ്ങളാക്കിയത് രണ്ടാമത്തെ ചേരുവ ചേർത്തു, വെള്ളം വറ്റുന്നതുവരെ വേവിക്കണം.
പാനിൽ എണ്ണ ചൂടാക്കി, മല്ലിയില ചേർത്തു നല്ല ചൂടിൽ രണ്ടു മിനിറ്റ് വഴറ്റുക.
ഇതിലേക്ക് ചിക്കൻ വേവിച്ചതു ചേർത്ത് വീണ്ടും ഒരു മിനിറ്റ് വേവിക്കുക.
അഞ്ചാമത്തെ ചേരുവകളെല്ലാം ചതച്ചെടുത്തു വയ്ക്കുക.
ഇതു ചിക്കനു മുകളിൽ വിതറി, അടുപ്പിൽ നിന്നു വാങ്ങി ചൂടോടെ വിളമ്പുക.