ഇപ്പോൾ കടച്ചക്ക അഥവാ ശീമച്ചക്കയുടെ സീസണാണ്. മഴക്കാലമായതിനാൽ മീനും കിട്ടാനില്ല. മീനും ഇറച്ചിയും ഇല്ലെങ്കിലും ഇറച്ചിക്കറിയുടെ അതേ രുചിയിൽ വറുത്തരച്ച കടച്ചക്ക കറി ഉണ്ടാക്കിയാലോ. . . പ്രഭാത ഭക്ഷണത്തിന്റെ കൂടെയും ഊണിനൊപ്പവും രാത്രിയിൽ ചപ്പാത്തി കഴിക്കാനും ഈ ഒരു കറി മതി.
ആവശ്യമായ ചേരുവകൾ
കടച്ചക്ക - ഒന്നിന്റെ പകുതി
ചെറിയ ഉള്ളി - 10 എണ്ണം
സവാള - ഒരെണ്ണം
പച്ചമുളക് - രണ്ടെണ്ണം
ഇഞ്ചി - ഒരു ചെറിയ കഷ്ണം
വെളുത്തുള്ളി - 4 അല്ലി
തക്കാളി - 1 എണ്ണം
നാളികേരം ചിരകിയത് - ഒരു കപ്പ്
മഞ്ഞൾപ്പൊടി - അര ടീസ്പൂൺ
മല്ലിപ്പൊടി - ഒരു ടേബിൾ സ്പൂൺ
മുളകുപൊടി - രണ്ടു ടീസ്പൂൺ
ഗരം മസാല - അര ടീസ്പൂൺ
നാളികേരക്കൊത്ത് - ആവശ്യത്തിന്
വെളിച്ചെണ്ണ - ആവശ്യത്തിന്
ഉപ്പ് - ആവശ്യത്തിന്
കറിവേപ്പില - ആവശ്യത്തിന്
വറ്റൽ മുളക് - 3 എണ്ണം
യാറാക്കുന്ന വിധം
ഒരു ഫ്രൈയിങ് പാൻ ചൂടാക്കി അതിലേക്കു മല്ലിപ്പൊടിയും മുളകുപൊടിയും ചേർത്ത് ഒന്ന് വറുത്തെടുക്കുക.
ഒരു ബൗളിലേക്കു കടച്ചക്ക, ചെറുതാക്കി മുറിച്ച ചെറിയ ഉള്ളി, മഞ്ഞൾപ്പൊടി, വറുത്തെടുത്ത മല്ലിപ്പൊടി, മുളകുപൊടി, കറിവേപ്പില, ആവശ്യത്തിന് ഉപ്പും കുറച്ചു വെളിച്ചെണ്ണയും ഒഴിച്ച് നന്നായി യോജിപ്പിക്കുക.
ഇനി തേങ്ങാ വറുത്തെടുക്കണം. ഇതിനായി ഒരു ഫ്രൈയിങ് പാൻ വച്ച് ചൂടാക്കിയ ശേഷം പാനിലേക്കു നാളികേരം ചിരകിയതും രണ്ടു ചെറിയ ഉള്ളി മുറിച്ചതും ചേർത്ത് വറക്കുക. നാളികേരം ബ്രൗൺ നിറമാകുന്നവരെ വറുക്കണം. വറുത്തെടുത്ത നാളികേരം തണുക്കാൻ വയ്ക്കുക.
ഇനി ഒരു പാൻ ചൂടാക്കി വെളിച്ചെണ്ണ ഒഴിച്ച് നാളികേര കൊത്തു ചേർത്ത് വറുക്കാം. ശേഷം ഇതിലേക്ക് ചെറുതായി മുറിച്ച ഇഞ്ചിയും വെളുത്തുള്ളിയും സവാള മുറിച്ചതും പച്ചമുളകും കറി വേപ്പിലയും നാളികേരക്കൊത്തും കൂടി ചേർത്ത് വഴറ്റുക. ഇതെല്ലാം നല്ല ബ്രൗൺ നിറമാകുമ്പോൾ ഇതിലേക്ക് ചെറുതായി മുറിച്ച തക്കാളി ചേർത്ത് വഴറ്റുക. തക്കാളി വഴന്നു വരുമ്പോൾ നേരത്തെ തയാറാക്കി വച്ച കടച്ചക്ക ചേർത്ത് കൊടുക്കുക. കടച്ചക്ക വേകാനുള്ള വെള്ളവും ചേർത്ത് മൂടി വച്ച് വേവിക്കുക.
ഈ സമയത്തു വറത്തു വച്ച നാളികേരം വെള്ളം ചേർക്കാതെ അരച്ചെടുക്കുക. കടച്ചക്ക വെന്തതിലേക്കു നാളികേരം അരച്ചത് ചേർത്ത് കൊടുക്കുക. ഗ്രേവിക്ക് വേണ്ടി ചെറു ചൂട് വെള്ളം ചേർത്തു ഒന്ന് തിളച്ചു വരുമ്പോൾ ആവശ്യത്തിന് ഉപ്പും കൂടെ ഗരം മസാലയും കൂടി ചേർത്തു യോജിപ്പിച്ചു കറി ഇറക്കി വയ്ക്കാം.
അതിനുശേഷം ഒരു ചീനചട്ടിയിലേക്കു കുറച്ചു വെളിച്ചെണ്ണ ഒഴിച്ച് ചൂടാകുമ്പോൾ ചെറിയ ഉള്ളിമുറിച്ചത് ചേർത്ത് കൊടുക്കുക. ഉള്ളി മൂത്തു വരുമ്പോൾ വറ്റൽ മുളകും കറി വേപ്പിലയും ചേർത്ത് മൂപ്പിച്ചു കടച്ചക്ക കറിയിലേക്കു ഒഴിച്ച് കൊടുക്കുക. കടച്ചക്ക വറുത്തരച്ച കറി റെഡി.