കോഴിക്കറിയും ഫ്രൈയും എല്ലാം നമ്മൾ ഉണ്ടാകാറുണ്ട്. എന്നാൽ വ്യത്യസ്തമായ രുചിയിൽ ചിക്കൻ ഫ്രൈ തയാറാക്കുന്നത് എങ്ങനെയെന്നു നോക്കാം.
ചേരുവകൾ:
ചിക്കൻ - 1 കിലോ (ചെറിയ കഷണങ്ങളാക്കിയത്)
മഞ്ഞൾപ്പൊടി -1 ടീസ്പൂൺ
കാശ്മീരി ചില്ലി പൗഡർ -21/2 ടേബിൾ സ്പൂൺ
ഇഞ്ചി വെളുത്തുള്ളി ചെറിയ ഉള്ളി എല്ലാം കൂടെ ചതച്ചത് -2 1/2 ടേബിൾ സ്പൂൺ
ഉപ്പ് - ആവശ്യത്തിന്
കറിവേപ്പില -ആവശ്യത്തിന്
നാരങ്ങാ നീര് - ഒരു നാരങ്ങയുടെ നീര്
ഗരം മസാല പൊടിച്ചത് - 1 ടീസ്പൂൺ
മല്ലിപ്പൊടി -1 ടീസ്പൂൺ
വറ്റൽ മുളക് - 4 എണ്ണം
ചതച്ച വറ്റൽ മുളക് - 2 ടീ സ്പൂൺ
ചെറിയ ഉള്ളി - 30 എണ്ണം
വെളിച്ചെണ്ണ - വറുക്കാൻ ആവശ്യത്തിന്
ടൊമാറ്റോ സോസ് -1/2 കപ്പ്
തയാറാക്കുന്ന വിധം:
ഒരു വലിയ ബൗളിലേക്കു മഞ്ഞൾപ്പൊടി, കാശ്മീരി ചില്ലി പൗഡർ, ഉപ്പ്, നാരങ്ങാ നീര്, ഇഞ്ചി വെളുത്തുള്ളി, ചെറിയ ഉള്ളി ചതച്ചതും കറി വേപ്പിലയും കൂടെ യോജിപ്പിച്ച് അതിലേക്ക് കഴുകി വൃത്തിയാക്കിയ ചിക്കൻ ഇട്ടു മസാല തേച്ചു പിടിപ്പിച്ചു 1 മണിക്കൂർ വയ്ക്കുക.
ശേഷം വേറൊരു പാൻ എടുത്ത് അതിലേക് വെളിച്ചെണ്ണ ഒഴിച്ച് ചൂടാക്കി മസാല ഇട്ട ചിക്കൻ പൊരിച്ചെടുക്കുക.
ചിക്കൻ പൊരിച്ചെടുത്ത അതെ എണ്ണയിൽ നിന്ന് 2 ടേബിൾ സ്പൂൺ എണ്ണ എടുത്തു വേറൊരു പാത്രം ചൂടാക്കി അതിലെക്ക് ഒഴിച്ച് കൊടുത്തു അതിലേക്ക് വറ്റൽ മുളകും ചെറുതായി അരിഞ്ഞ ചെറിയ ഉള്ളിയും ഇട്ടു വഴറ്റി എടുക്കുക. ഇഞ്ചി വെളുത്തുള്ളി ചെറിയ ഉള്ളി ചതച്ചത് 1 ടീസ്പൂൺ ഇട്ട് കൊടുത്തു ഒന്നുടെ വഴറ്റി എടുക്കുക. കറി വേപ്പില ചേർത്ത് കൊടുക്കുക. ശേഷം ടൊമാറ്റോ സോസും ചേർത്ത് വഴറ്റി കാശ്മീരി ചില്ലി പൗഡർ ചേർത്ത് കൊടുക്കുക. ഗരം മസാലയും മല്ലിപ്പൊടിയും ചേർത്ത് ശേഷം ചതച്ച വറ്റൽ മുളകും ചേർക്കാം. ഉപ്പ് ആവശ്യമുണ്ടെങ്കിൽ ചേർത്ത് കൊടുക്കണം. ഇതിലേക്ക് വറുത്ത ചിക്കൻ ഇട്ടു നന്നായി യോജിപ്പിച്ചെടുക്കുക. ചിക്കൻ കൊണ്ടാട്ടം റെഡി.