പത്തനംതിട്ട: 2025-26 മണ്ഡല-മകരവിളക്ക് തീർത്ഥാടന കാലയളവിലെ ആദ്യത്തെ 15 ദിവസത്തെ വരുമാനക്കണക്കുകൾ പ്രകാരം ശബരിമല ദേവസ്വം ബോർഡിന് 92 കോടി രൂപ ലഭിച്ചു. കഴിഞ്ഞ സീസണിൽ ഇതേ സമയത്തെ വരുമാനം 69 കോടി രൂപയായിരുന്ന സ്ഥാനത്ത്, ഈ വർഷം 33.33 ശതമാനം വർധനവാണ് ഉണ്ടായിരിക്കുന്നത്. ഈ കണക്ക് നവംബർ 30 വരെയുള്ളതാണ്.(Sabarimala revenue surges, Revenue in the first 15 days is Rs 92 crore)
വരുമാനത്തിന്റെ ഭൂരിഭാഗവും ലഭിച്ചിരിക്കുന്നത് അരവണ വിൽപ്പനയിൽ നിന്നാണ്. അരവണയിൽ നിന്നുള്ള വരുമാനം 47 കോടി രൂപയായി വർധിച്ചു; കഴിഞ്ഞ വർഷം ഇത് 32 കോടിയായിരുന്നു. അതായത്, 46.86 ശതമാനം വർധനവ്. കാണിക്കയിൽ നിന്നുള്ള വരുമാനം കഴിഞ്ഞ വർഷത്തെ 22 കോടിയിൽ നിന്ന് ഈ സീസണിൽ 26 കോടിയായി ഉയർന്നു.
18.18 ശതമാനം വർധനവാണ് ഇതിലുണ്ടായിരിക്കുന്നത്. അപ്പം വിൽപ്പനയിൽ നിന്ന് ഇതുവരെ 3.5 കോടി രൂപയാണ് ലഭിച്ചത്, കഴിഞ്ഞ വർഷവും ഇത് ഏകദേശം ഇതേ തുക തന്നെയായിരുന്നു. ഈ സീസണിൽ നവംബർ 30 വരെ 13 ലക്ഷത്തോളം തീർത്ഥാടകരാണ് ശബരിമലയിൽ എത്തിയത്.