പത്തനംതിട്ട: ശബരിമല സന്നിധാനത്ത് മണ്ഡലകാല തീർത്ഥാടനത്തിന് പരിസമാപ്തി കുറിച്ച് ഇന്ന് പ്രസിദ്ധമായ മണ്ഡലപൂജ നടക്കും. രാവിലെ 10.10-നും 11.30-നും ഇടയിലുള്ള ശുഭമുഹൂർത്തത്തിലാണ് തങ്ക അങ്കി ചാർത്തിയുള്ള മണ്ഡലപൂജ നടക്കുക.(Mandala Puja at Sabarimala today, restrictions to pilgrims)
മണ്ഡലപൂജയോടനുബന്ധിച്ച് തങ്ക അങ്കി വിഭൂഷിതനായ അയ്യപ്പസ്വാമിയെ ദർശിക്കാൻ വൻ ഭക്തജനത്തിരക്ക് കണക്കിലെടുത്ത് പ്രത്യേക നിയന്ത്രണമേർപ്പെടുത്തിയിട്ടുണ്ട്. ഇന്ന് രാത്രി 11-ന് ഹരിവരാസനം പാടി നട അടയ്ക്കുന്നതോടെ 41 ദിവസം നീണ്ടുനിന്ന മണ്ഡലകാലത്തിന് പരിസമാപ്തിയാകും.
മണ്ഡലപൂജ കഴിഞ്ഞ് നട അടച്ചാൽ, മകരവിളക്ക് ഉത്സവത്തിനായി ഡിസംബർ 30-ന് വൈകിട്ട് അഞ്ച് മണിക്ക് നട വീണ്ടും തുറക്കും. ജനുവരി 14-നാണ് ലോകപ്രസിദ്ധമായ മകരവിളക്ക് ദർശനം.