ലക്നൗ: ഉത്തർപ്രദേശിലെ ലക്നൗ ഗോംതി നഗർ റെയിൽവേ സ്റ്റേഷനിൽ നിർത്തിയിട്ടിരുന്ന ട്രെയിനിൽ ട്രങ്ക് പെട്ടിക്കുള്ളിൽ വെട്ടിമുറിച്ച നിലയിൽ യുവതിയുടെ മൃതദേഹം കണ്ടെത്തി. ബീഹാറിലെ ഛപ്രയിൽ നിന്ന് സർവീസ് ആരംഭിച്ച് ലക്നൗവിൽ യാത്ര അവസാനിപ്പിച്ച ട്രെയിനിലെ സ്ലീപ്പർ കോച്ചിലാണ് രക്തം വാർന്ന നിലയിലുള്ള പെട്ടി ശുചീകരണ തൊഴിലാളികളുടെ ശ്രദ്ധയിൽപ്പെട്ടത്. (Womans Chopped Up Body Found On Train)
തൊഴിലാളികൾ വിവരമറിയിച്ചതിനെ തുടർന്ന് റെയിൽവേ ഭരണകൂടവും ഗവൺമെന്റ് റെയിൽവേ പോലീസും എത്തി പെട്ടി തുറന്ന് പരിശോധിച്ചപ്പോഴാണ് ക്രൂരമായ കൊലപാതക വിവരം പുറത്തറിയുന്നത്. യുവതിയുടെ തല ഉടലിൽ നിന്ന് വേർപെടുത്തിയ നിലയിലായിരുന്നു. കൈകളും കാലുകളും പ്ലാസ്റ്റിക് കവറുകളിലാക്കി വസ്ത്രങ്ങൾക്കിടയിൽ ഒളിപ്പിച്ച നിലയിലായിരുന്നു ട്രങ്കിൽ സൂക്ഷിച്ചിരുന്നത്. കൊല്ലപ്പെട്ട യുവതിക്ക് 30-നും 35-നും ഇടയിൽ പ്രായമുണ്ടെന്നും മൃതദേഹത്തിന് രണ്ട് ദിവസത്തെ പഴക്കമുണ്ടെന്നും ജി.ആർ.പി എസ്.പി രോഹിത് മിശ്ര അറിയിച്ചു.
കഴുത്തറുത്താണ് കൊലപാതകം നടത്തിയിരിക്കുന്നതെന്നും പ്രതിരോധിക്കാൻ ശ്രമിച്ചതിന്റെ ലക്ഷണങ്ങൾ ശരീരത്തിലുണ്ടെന്നും പോലീസ് വ്യക്തമാക്കി. ബീഹാറിലെ ഥാവേ സ്റ്റേഷനിൽ വെച്ചാകാം മൃതദേഹം അടങ്ങിയ പെട്ടി ട്രെയിനിൽ ഉപേക്ഷിച്ചതെന്നാണ് പോലീസിന്റെ പ്രാഥമിക നിഗമനം. പ്രതികളെ കണ്ടെത്തുന്നതിനായി മൂന്ന് പ്രത്യേക അന്വേഷണ സംഘങ്ങൾ രൂപീകരിച്ച് റെയിൽവേ സ്റ്റേഷനുകളിലെ സി.സി.ടി.വി ദൃശ്യങ്ങൾ പോലീസ് പരിശോധിച്ചുവരികയാണ്.
Summary: In a gruesome discovery, the chopped-up body of an unidentified woman, aged between 30 and 35, was found inside an abandoned trunk in a train sleeper coach at Lucknow’s Gomti Nagar station. Cleaning staff noticed blood dripping from the trunk after the train, arriving from Bihar’s Chhapra, had emptied. Railway police revealed the victim’s head was severed and limbs were packed in polythene bags hidden beneath clothes, indicating a violent struggle. Authorities suspect the body was loaded during a 30-minute halt at Bihar’s Thawe station and have formed three teams to analyze CCTV footage.
