ഐപിഎൽ 2026 സീസണിന് മുന്നോടിയായി റോയൽ ചലഞ്ചേഴ്സ് ബെംഗളൂരുവിനോട് വിരാട് കോഹ്ലി (Virat Kohli) വൻ ആവശ്യങ്ങൾ ഉന്നയിച്ചു എന്ന തരത്തിൽ പ്രചരിക്കുന്ന വാർത്തകൾ വ്യാജമാണെന്ന് താരം തന്നെ വ്യക്തമാക്കിയിരിക്കുകയാണ്. മത്സരങ്ങൾക്കിടയിൽ ലണ്ടനിലേക്ക് പോകാൻ ചാർട്ടേഡ് വിമാനം വേണമെന്നും, രണ്ട് മത്സരങ്ങൾക്കിടയിൽ മൂന്ന് ദിവസത്തെ ഇടവേളയുണ്ടെങ്കിൽ ലണ്ടനിലേക്ക് പോകാൻ അനുമതി നൽകണമെന്നും കോഹ്ലി ആവശ്യപ്പെട്ടെന്നായിരുന്നു ചില മാധ്യമങ്ങളിൽ വന്ന റിപ്പോർട്ടുകൾ. എന്നാൽ ഇൻസ്റ്റാഗ്രാം സ്റ്റോറിയിലൂടെ ഈ അവകാശവാദത്തിന്റെ സ്ക്രീൻഷോട്ട് പങ്കുവെച്ച കോഹ്ലി, രണ്ട് ‘ചിരിക്കുന്ന’ ഇമോജികൾ ചേർത്താണ് ഇതിന് മറുപടി നൽകിയത്. ഇത്തരം വാർത്തകളിൽ യാതൊരു സത്യവുമില്ലെന്ന് താരം ഇതിലൂടെ പരോക്ഷമായി വ്യക്തമാക്കുന്നു.
മാർച്ച് 28-ന് സൺറൈസേഴ്സ് ഹൈദരാബാദിനെതിരെയാണ് ആർസിബിയുടെ ഈ സീസണിലെ ആദ്യ മത്സരം നടക്കുന്നത്. ഈ സീസണിൽ ചില നിർണ്ണായക റെക്കോർഡുകളും കോഹ്ലിയെ കാത്തിരിക്കുന്നുണ്ട്. ഐപിഎൽ ചരിത്രത്തിൽ 9,000 റൺസ് തികയ്ക്കുന്ന ആദ്യ താരമാകാനുള്ള തയ്യാറെടുപ്പിലാണ് അദ്ദേഹം. കൂടാതെ ആർസിബിക്കായി മാത്രം എല്ലാ ടി20 മത്സരങ്ങളിൽ നിന്നുമായി 10,000 റൺസ് തികയ്ക്കുന്ന ആദ്യ താരമാകാനും കോഹ്ലിക്ക് ഈ സീസണിലൂടെ സാധിച്ചേക്കും. കഴിഞ്ഞ സീസണിൽ 15 ഇന്നിംഗ്സുകളിൽ നിന്ന് 54.75 ശരാശരിയിൽ 657 റൺസാണ് കോഹ്ലി അടിച്ചുകൂട്ടിയത്. തന്റെ 18-ാം സീസണിലും മികച്ച ഫോം തുടർന്ന് ആർസിബിയുടെ കിരീടം നിലനിർത്താനാണ് താരം ലക്ഷ്യമിടുന്നത്.
