വഡോദര: ഗുജറാത്തിലെ വഡോദരയിൽ ദേവ് നദിയിൽ മുതലയുടെ ആക്രമണത്തിൽ കൊല്ലപ്പെട്ട മിഥുൻ മഹേഷ്ഭായ് വാസവ (22) എന്ന യുവാവിൻ്റെ മൃതദേഹം ഒടുവിൽ കണ്ടെടുത്തു (Vadodara Crocodile Attack). വ്യാഴാഴ്ച (മെയ് 7) ഉച്ചയ്ക്ക് വാഗോഡിയ താലൂക്കിലെ കാഗ്ഡിപുര ഗ്രാമത്തിന് സമീപമാണ് നാടിനെ നടുക്കിയ ഈ സംഭവം നടന്നത്.
കന്നുകാലികളെ മേയ്ക്കുന്നതിനിടെ ദാഹം അനുഭവപ്പെട്ട മിഥുൻ നദിയിൽ വെള്ളം കുടിക്കാനായി ഇറങ്ങിയപ്പോഴാണ് 12 അടിയോളം നീളമുള്ള ഭീമൻ മുതല ആക്രമിച്ചത്. മിഥുനെ കടന്നുപിടിച്ച മുതല ഉടൻ തന്നെ ആഴങ്ങളിലേക്ക് വലിച്ചിഴച്ചു. സംഭവത്തിന് സാക്ഷികളായവർ അധികൃതരെ വിവരമറിയിച്ചതിനെത്തുടർന്ന് വനം വകുപ്പും അഗ്നിശമന സേനയും തിരച്ചിൽ ആരംഭിച്ചു.
മിഥുൻ്റെ മൃതദേഹം വായിൽ കടിച്ചുകൊണ്ട് മുതല നദിയിലൂടെ മണിക്കൂറുകളോളം നീന്തിത്തുടിക്കുന്ന കാഴ്ച നാട്ടുകാരിലും രക്ഷാപ്രവർത്തകരിലും വലിയ നടുക്കമുണ്ടാക്കി. പലപ്പോഴും മുതല ഉപരിതലത്തിലേക്ക് വരുമെങ്കിലും രക്ഷാപ്രവർത്തകർ അടുത്തെത്തുമ്പോഴേക്കും മൃതദേഹവുമായി ആഴങ്ങളിലേക്ക് മുങ്ങുകയായിരുന്നു. രാത്രിയായതോടെ രക്ഷാപ്രവർത്തനം താൽക്കാലികമായി നിർത്തിവെച്ചു.
ഇന്ന് (വെള്ളിയാഴ്ച) പുലർച്ചെ ഗ്രാമവാസികൾ വീണ്ടും നദിക്കരയിൽ എത്തിയപ്പോൾ മുതല മൃതദേഹം ഉപേക്ഷിച്ച നിലയിൽ കണ്ടെത്തുകയായിരുന്നു. മറ്റ് മുതലകൾ മൃതദേഹത്തിന് ചുറ്റും എത്തിയെങ്കിലും നാട്ടുകാർ ശബ്ദമുണ്ടാക്കി അവയെ തുരത്തിയാണ് മിഥുൻ്റെ മൃതദേഹം കരയ്ക്കെത്തിച്ചത്. മിഥുൻ്റെ കുടുംബത്തിൻ്റെ ഏക ആശ്രയമായിരുന്നു ഈ യുവാവ്.
വഡോദരയിലെ നദികളിൽ മുതലകളുടെ എണ്ണം വർദ്ധിക്കുന്നത് ഗ്രാമവാസികൾക്കിടയിൽ വലിയ ഭീതി സൃഷ്ടിച്ചിട്ടുണ്ട്. നദിക്കരയിൽ താമസിക്കുന്നവർ അതീവ ജാഗ്രത പാലിക്കണമെന്ന് ജില്ലാ ഭരണകൂടം കർശന നിർദ്ദേശം നൽകി.
Story Summary: The body of 22-year-old Mithun Maheshbhai Vasava, who was killed by a 12-foot crocodile in the Dev River, Vadodara, was recovered on Friday morning. The crocodile had dragged him away while he was drinking water on Thursday and swam with his body in its mouth for hours before releasing it near Kagdipura village.
