ചിക്കമഗളൂരു: ചിക്കമഗളൂരുവിലെ മലനിരയിൽ ജനവാസ കേന്ദ്രങ്ങൾക്ക് മുകളിലൂടെ അജ്ഞാത ചെറുവിമാനം അസാധാരണമാംവിധം താഴ്ന്നു പറന്നത് വലിയ ദുരൂഹതയാകുന്നു. ചൊവ്വാഴ്ചയാണ് എൻ.ആർ. പുര താലൂക്കിനും ഭദ്ര നദിക്കരയ്ക്കും ഇടയിലുള്ള പ്രദേശങ്ങളിൽ വിമാനം പ്രത്യക്ഷപ്പെട്ടത്. (Unidentified aircraft flies low in Chikkamagaluru, Fear, police investigation)
ഭൂമിയിൽ തൊടുമെന്ന മട്ടിൽ വിമാനം പറന്നതോടെ ഭീതിയിലായിരുന്നു നാട്ടുകാർ. കളസ മുതൽ ബോളെഹൊന്നൂർ വരെയുള്ള മേഖലയിലാണ് വിമാനം താഴ്ന്നു പറന്നത്. സാധാരണയായി വിമാനങ്ങൾ സഞ്ചരിക്കുന്ന ഉയരത്തേക്കാൾ വളരെ താഴെയായിരുന്നു ഇതിന്റെ സഞ്ചാരം.
ബോളെഹൊന്നൂരിൽ വെച്ച് വിമാനം താഴ്ന്നു പറക്കുന്ന ദൃശ്യങ്ങൾ നാട്ടുകാർ മൊബൈലിൽ പകർത്തിയിട്ടുണ്ട്. രണ്ട് തവണ മേഖലയിൽ വട്ടംചുറ്റിയ ശേഷം വിമാനം ശിവമോഗ ഭാഗത്തേക്ക് പോയതായാണ് ലഭിക്കുന്ന വിവരം. ഇത്തരമൊരു പറക്കലിനെക്കുറിച്ച് പോലീസിനോ വനംവകുപ്പിനോ മുൻകൂട്ടി യാതൊരു വിവരവും ലഭിച്ചിരുന്നില്ല. ഡിജിസിഎ നിഷ്കർഷിക്കുന്ന സുരക്ഷാ മാനദണ്ഡങ്ങൾ ലംഘിക്കപ്പെട്ടോ എന്നതും പരിശോധിക്കുന്നുണ്ട്. സംഭവത്തിൽ പോലീസ് അന്വേഷണം ഊർജ്ജിതമാക്കി.
