ഹൈദരാബാദ്: തെലങ്കാനയിലെ രംഗറെഡ്ഡി ജില്ലയിൽ നൂറിലധികം തെരുവുനായ്ക്കളെ കൂട്ടത്തോടെ കൊന്നൊടുക്കിയ സംഭവത്തിൽ ഗ്രാമപഞ്ചായത്ത് അധികൃതർക്കെതിരെ പോലീസ് കേസെടുത്തു (Telangana Stray Dog Killing). യാചാരം ഗ്രാമപഞ്ചായത്തിലെ ശയംപേട്ട്, ആരെ പള്ളി മേഖലകളിലാണ് ദാരുണമായ സംഭവം നടന്നത്. മൃഗസംരക്ഷണ പ്രവർത്തകർ നൽകിയ പരാതിയുടെ അടിസ്ഥാനത്തിൽ പഞ്ചായത്ത് പ്രസിഡന്റ്, സെക്രട്ടറി, വാർഡ് അംഗങ്ങൾ എന്നിവരടക്കം ഒൻപത് പേർക്കെതിരെയാണ് എഫ്ഐആർ രജിസ്റ്റർ ചെയ്തിരിക്കുന്നത്.
രണ്ട് പേരെ പ്രത്യേകം കൂലിക്കെടുത്ത് തെരുവുനായ്ക്കളെ വിഷം കുത്തിവച്ച് കൊലപ്പെടുത്തിയെന്നാണ് പ്രാഥമിക നിഗമനം. ഈ മാസം ഒൻപതിനാണ് പരാതിക്ക് ആസ്പദമായ സംഭവം നടന്നതെങ്കിലും 300-ഓളം നായ്ക്കളെ കൊന്നൊടുക്കിയതായാണ് എഫ്ഐആറിലെ ആരോപണം. മൃഗങ്ങൾക്കെതിരെയുള്ള ക്രൂരത തടയൽ നിയമപ്രകാരമാണ് ഇവർക്കെതിരെ കേസ് എടുത്തിട്ടുള്ളത്. കൊല്ലപ്പെട്ട നായ്ക്കളുടെ മൃതദേഹങ്ങൾ കുഴിച്ചുമൂടിയ നിലയിലാണ് കണ്ടെത്തിയത്. ഇവ പുറത്തെടുത്ത് പോസ്റ്റ്മോർട്ടം നടത്തുമെന്ന് പോലീസ് അറിയിച്ചു.
പ്രദേശത്ത് തെരുവുനായ ശല്യം രൂക്ഷമാണെന്നും ഇതിനെതിരെ നടപടിയെടുക്കാൻ അധികൃതർ തയ്യാറാകാത്തതിനാലാണ് ഇത്തരമൊരു നീക്കം ഉണ്ടായതെന്നും നാട്ടുകാർ പറയുന്നു. എന്നാൽ നിയമവിരുദ്ധമായി നായ്ക്കളെ കൊന്നൊടുക്കുന്നത് അംഗീകരിക്കാനാവില്ലെന്ന് മൃഗസ്നേഹികൾ വ്യക്തമാക്കി. സംഭവത്തിൽ വിശദമായ അന്വേഷണം ആരംഭിച്ചിട്ടുണ്ടെന്നും കുറ്റക്കാർക്കെതിരെ കർശന നടപടി സ്വീകരിക്കുമെന്നും പോലീസ് അറിയിച്ചു.
A case has been registered against village panchayat authorities in Telangana's Rangareddy district for allegedly hiring individuals to mass kill over 100 stray dogs. Following a complaint from animal rights activists, the police booked nine people, including the Panchayat President and Secretary, under the Prevention of Cruelty to Animals Act. Investigations revealed that the dogs were reportedly injected with poison and buried, and authorities plan to conduct post-mortems to confirm the cause of death.