ന്യൂഡൽഹി: 11 ദിവസത്തെ അനധികൃത അവധിയുടെ പേരിൽ ജോലിയിൽ നിന്ന് പിരിച്ചുവിട്ട സി.ഐ.എസ്.എഫ് കോൺസ്റ്റബിളിന് ആശ്വാസമേകി സുപ്രീം കോടതി. കോൺസ്റ്റബിളിനെ തിരിച്ചെടുക്കണമെന്ന പഞ്ചാബ്-ഹരിയാന ഹൈക്കോടതി വിധി ചോദ്യം ചെയ്ത് കേന്ദ്ര സർക്കാർ സമർപ്പിച്ച ഹർജി തള്ളിയ ജസ്റ്റിസ് ബി.വി. നാഗരത്ന, ജസ്റ്റിസ് ഉജ്ജൽ ഭുയാൻ എന്നിവരടങ്ങിയ ബെഞ്ച് സർക്കാരിന് 25,000 രൂപ പിഴയും ചുമത്തി. അനാവശ്യമായ കേസുകൾ കോടതിയിലെത്തിക്കുന്നതിനെ ബെഞ്ച് രൂക്ഷമായി വിമർശിച്ചു.(Supreme Court fines central government Rs 25,000, relief for CISF jawan)
രാജ്യത്തെ ഏറ്റവും വലിയ വ്യവഹാരി കേന്ദ്ര സർക്കാരാണെന്നും കോടതികളിലെ കേസുകൾ കെട്ടിക്കിടക്കാൻ ഇത് കാരണമാകുന്നുണ്ടെന്നും ജസ്റ്റിസ് നാഗരത്ന ചൂണ്ടിക്കാട്ടി. ഹൈക്കോടതി ഒരു ശിക്ഷ ആനുപാതികമല്ലെന്ന് കണ്ട് റദ്ദാക്കിയാൽ, അത്തരം കേസുകൾ സുപ്രീം കോടതിയിലേക്ക് കൊണ്ടുവരരുത് എന്ന് നിയമോപദേശം നൽകാൻ ഇവിടെ ആരുമില്ലേ എന്ന് കോടതി ചോദിച്ചു. “കോടതിയിൽ കേസുകൾ കെട്ടിക്കിടക്കുന്നു എന്ന് ഞങ്ങൾ എപ്പോഴും വിളിച്ചുപറയുന്നുണ്ട്. എന്നാൽ ആരാണ് ഇവിടെ ഏറ്റവും കൂടുതൽ കേസുകൾ ഫയൽ ചെയ്യുന്നത്? ഈ കേസ് പിഴയോടെ തള്ളേണ്ടതാണ്,” ജസ്റ്റിസ് ബി.വി. നാഗരത്ന പറഞ്ഞു.
പത്തു വർഷത്തോളം സർവീസുള്ള കോൺസ്റ്റബിളിനെതിരെ രണ്ട് ആരോപണങ്ങളാണ് സി.ഐ.എസ്.എഫ് ഉന്നയിച്ചിരുന്നത്. അനുവാദമില്ലാതെ 11 ദിവസം ജോലിക്ക് ഹാജരാകാതിരുന്നത്. മറ്റൊരു സി.ഐ.എസ്.എഫ് ഉദ്യോഗസ്ഥന്റെ മകളെ മുംബൈയിൽ നിന്ന് കൂട്ടിക്കൊണ്ടുപോയി സ്വന്തം സഹോദരനുമായി വിവാഹം കഴിപ്പിച്ചു എന്നത്. അവധിയിലായിരുന്ന സമയത്ത് പരിശോധനയ്ക്ക് എത്തിയപ്പോൾ കോൺസ്റ്റബിളിനെ കാണാതിരുന്നതാണ് ഒന്നാമത്തെ കുറ്റം. രണ്ടാമത്തെ കുറ്റത്തിൽ, വിവാഹിതയായ യുവതി നേരിട്ട് ഹാജരായി തനിക്ക് പരാതിയില്ലെന്നും കോൺസ്റ്റബിളിന്റെ സഹോദരനെ തന്നെയാണ് വിവാഹം കഴിച്ചതെന്നും വ്യക്തമാക്കിയിരുന്നു.
കോൺസ്റ്റബിളിന്റെ ഭാഗത്തുനിന്നുണ്ടായ സാഹചര്യങ്ങളെ കോടതി മനുഷ്യത്വപരമായി സമീപിച്ചു. “ഒരു കുടുംബത്തിൽ നിന്ന് ആരെങ്കിലും ഒളിച്ചോടിപ്പോയാൽ ആ കുടുംബത്തിനുണ്ടാകുന്ന മാനസിക സമ്മർദ്ദം നിങ്ങൾക്കറിയാമോ? ആ പ്രശ്നങ്ങൾ പരിഹരിക്കാനും അവരെ വിവാഹം കഴിപ്പിക്കാനും പോയതായിരുന്നു അദ്ദേഹം. അത് കഴിഞ്ഞ് അദ്ദേഹം തിരികെ വരികയും ചെയ്തു,” ജസ്റ്റിസ് നാഗരത്ന പറഞ്ഞു. നേരത്തെ സിംഗിൾ ബെഞ്ചും പിന്നീട് ഡിവിഷൻ ബെഞ്ചും കോൺസ്റ്റബിളിനെ പിരിച്ചുവിട്ട നടപടി തെറ്റാണെന്ന് കണ്ടെത്തിയിരുന്നു. ജോലിയിൽ തിരികെ പ്രവേശിപ്പിക്കാനും സർവീസ് തുടർച്ച നൽകാനും ഹൈക്കോടതി ഉത്തരവിട്ടു. ജോലി ചെയ്യാത്ത കാലയളവിലെ ശമ്പളം നൽകരുതെന്ന് കേന്ദ്ര സർക്കാരിന്റെ അഭിഭാഷകൻ വാദിച്ചെങ്കിലും, കോടതി അത് അംഗീകരിക്കാതെ ഹർജി പിഴയോടെ തള്ളുകയായിരുന്നു.
