ന്യൂഡൽഹി: മഹാരാഷ്ട്ര രാഷ്ട്രീയത്തിൽ അജിത് പവാറിന്റെ പിൻഗാമിയായി ഭാര്യ സുനേത്ര പവാർ ഉപമുഖ്യമന്ത്രിയായി സത്യപ്രതിജ്ഞ ചെയ്യുമെന്ന വാർത്തകളിൽ പ്രതികരണവുമായി എൻസിപി അധ്യക്ഷൻ ശരദ് പവാർ (Sharad Pawar). സുനേത്രയുടെ നിയമനത്തെക്കുറിച്ച് തനിക്ക് യാതൊരു അറിവുമില്ലെന്നും മാധ്യമങ്ങളിലൂടെയാണ് ഈ വിവരം അറിഞ്ഞതെന്നും അദ്ദേഹം ബാരാമതിയിൽ പറഞ്ഞു. ഇത് എൻസിപിയുടെ (അജിത് വിഭാഗം) മാത്രം തീരുമാനമാണെന്നും പവാർ കുടുംബവുമായി ഇതുസംബന്ധിച്ച് യാതൊരുവിധ ചർച്ചകളും നടന്നിട്ടില്ലെന്നും അദ്ദേഹം വ്യക്തമാക്കി.
അതേസമയം, കഴിഞ്ഞ നാലുമാസമായി എൻസിപി ലയനം സംബന്ധിച്ച് അജിത് പവാറുമായി ചർച്ചകൾ നടന്നിരുന്നതായി ശരദ് പവാർ വെളിപ്പെടുത്തി. ഫെബ്രുവരി 12-ന് ലയനം നടക്കണമെന്നായിരുന്നു അജിത്തിന്റെ താല്പര്യമെന്നും അദ്ദേഹം പറഞ്ഞു. ഇന്ന് നടക്കുന്ന നിയമസഭാ കക്ഷി യോഗത്തിൽ സുനേത്ര പവാറിനെ നേതാവായി തിരഞ്ഞെടുക്കുന്നതോടെ മഹാരാഷ്ട്രയിലെ ആദ്യ വനിതാ ഉപമുഖ്യമന്ത്രിയായി അവർ മാറും. എന്നാൽ രാഷ്ട്രീയത്തിൽ വലിയ പരിചയമില്ലാത്ത സുനേത്രയ്ക്ക് പാർട്ടി അധ്യക്ഷ പദവിയും ഉപമുഖ്യമന്ത്രി സ്ഥാനവും ഒരുമിച്ച് കൈകാര്യം ചെയ്യാനാകുമോ എന്ന ചർച്ചകളും രാഷ്ട്രീയ കേന്ദ്രങ്ങളിൽ സജീവമാണ്.
Summary
Sharad Pawar clarified that he was unaware of Sunetra Pawar’s appointment as Deputy Chief Minister and that the decision was made without consulting the Pawar family.
