ന്യൂഡൽഹി: ആഗോള പോപ്പ് സംഗീത ഇതിഹാസവും ഗ്രാമി അവാർഡ് ജേതാവുമായ ഷക്കീറ ഇന്ത്യയിൽ സംഗീത പരിപാടികൾ അവതരിപ്പിക്കാനൊരുങ്ങുന്നു (Shakira India Tour). 2026 ഏപ്രിലിൽ മുംബൈയിലും ഡൽഹിയിലുമാണ് പരിപാടികൾ നിശ്ചയിച്ചിരിക്കുന്നത്. സോമാറ്റോയുടെ കീഴിലുള്ള ‘ഫീഡിങ് ഇന്ത്യ’ എന്ന സന്നദ്ധ സംഘടന സംഘടിപ്പിക്കുന്ന സംഗീത നിശയുടെ ഭാഗമായാണ് ഷക്കീറ എത്തുന്നത്. ഇന്ത്യയിലെ പട്ടിണിയും പോഷകാഹാരക്കുറവും പരിഹരിക്കുക എന്ന ലക്ഷ്യത്തോടെയാണ് ഈ പരിപാടി സംഘടിപ്പിക്കുന്നത്.
ഏപ്രിൽ 10-ന് മുംബൈയിലെ മഹാലക്ഷ്മി റേസ് കോഴ്സിലും ഏപ്രിൽ 15-ന് ഡൽഹിയിലെ ജവഹർലാൽ നെഹ്റു സ്റ്റേഡിയത്തിലുമാണ് ഷക്കീറയുടെ ഷോകൾ നടക്കുക. 2007-ലെ ‘ഓറൽ ഫിക്സേഷൻ’ ടൂറിന് ശേഷം ആദ്യമായാണ് താരം ഇന്ത്യയിൽ ഒരു വൻകിട സംഗീത പരിപാടി അവതരിപ്പിക്കുന്നത്. “ഇന്ത്യയിലെ ആരാധകരുമായി വീണ്ടും ബന്ധപ്പെടാൻ സാധിക്കുന്നതിൽ വലിയ സന്തോഷമുണ്ടെന്നും, കുട്ടികളുടെ പോഷകാഹാര ലഭ്യത ഉറപ്പാക്കാനുള്ള ഈ ദൗത്യത്തിൽ പങ്കാളിയാകുന്നത് സംഗീതത്തേക്കാൾ വലിയ കാര്യമാണെന്നും” ഷക്കീറ വ്യക്തമാക്കി.
ഈ പരിപാടിയുടെ ടിക്കറ്റ് വിൽപ്പന ഫെബ്രുവരി 27-ന് ഉച്ചയ്ക്ക് 12 മണി മുതൽ എച്ച്.എസ്.ബി.സി ക്രെഡിറ്റ് കാർഡ് ഉടമകൾക്കായി ആരംഭിക്കും. പൊതുജനങ്ങൾക്കുള്ള ടിക്കറ്റ് വിൽപ്പന മാർച്ച് 1-ന് ഉച്ചയ്ക്ക് 1 മണി മുതൽ സോമാറ്റോയുടെ ‘ഡിസ്ട്രിക്റ്റ്’ആപ്പ് വഴി ലഭ്യമാകും. ഷക്കീറയ്ക്ക് പുറമെ പ്രശസ്ത റാപ്പർ കാന്യേ വെസ്റ്റും മാർച്ച് മാസത്തിൽ ഇന്ത്യയിൽ പരിപാടി അവതരിപ്പിക്കുന്നുണ്ട്.
Summary: Global pop icon Shakira is returning to India after nearly 20 years to headline the Feeding India Concert 2026 in Mumbai and Delhi.
