മുംബൈ: ഐപിഎൽ വരാനിരിക്കുന്ന സീസണിൽ ക്രിക്കറ്റ് ആരാധകർക്ക് ആവേശം പകരുന്ന വാർത്തയുമായി മുംബൈ ഇന്ത്യൻസ് മുഖ്യ പരിശീലകൻ മഹേള ജയവർധനെ (Rohit Sharma). മുൻ നായകൻ രോഹിത് ശർമ്മ ഇത്തവണ വെറും ‘ഇംപാക്ട് പ്ലെയർ’ ആയിരിക്കില്ലെന്നും മത്സരത്തിലുടനീളം അദ്ദേഹം മൈതാനത്തുണ്ടാകുമെന്നും ജയവർധനെ വ്യക്തമാക്കി. മുംബൈയിൽ നടന്ന ഒരു സ്വകാര്യ ചടങ്ങിലായിരുന്നു പരിശീലകന്റെ ഈ വെളിപ്പെടുത്തൽ.
കഴിഞ്ഞ 2025 സീസണിൽ ബാറ്റിംഗിന് ശേഷം രോഹിത്തിനെ ഇംപാക്ട് സബ്സ്റ്റിറ്റിയൂട്ടായി പിൻവലിക്കുന്ന രീതിയാണ് മുംബൈ മാനേജ്മെന്റ് സ്വീകരിച്ചിരുന്നത്. എന്നാൽ ഇത്തവണ ആ തന്ത്രത്തിൽ മാറ്റമുണ്ടാകുമെന്ന് ജയവർധനെ ഉറപ്പിച്ചു പറയുന്നു.
2025-ൽ രോഹിത്തിനുണ്ടായിരുന്ന ചില ശാരീരിക ബുദ്ധിമുട്ടുകൾ കാരണമാണ് ജോലിഭാരം കുറയ്ക്കാൻ ഇംപാക്ട് പ്ലെയറായി ഇറക്കിയത്. എന്നാൽ ഇപ്പോൾ താരം പൂർണ്ണ കായികക്ഷമതയിലാണ്. ടി20, ടെസ്റ്റ് ഫോർമാറ്റുകളിൽ നിന്ന് വിരമിച്ച രോഹിത്തിന് ഇപ്പോൾ ഏകദിനത്തിൽ മാത്രമാണ് അന്താരാഷ്ട്ര ചുമതലയുള്ളത്. അതിനാൽ ഐപിഎല്ലിൽ കൂടുതൽ സമയം ചെലവഴിക്കാൻ അദ്ദേഹത്തിന് സാധിക്കും.
നായകസ്ഥാനം ഹാർദിക് പാണ്ഡ്യയിലേക്ക് മാറിയെങ്കിലും രോഹിത് ശർമ്മ എന്ന താരത്തിന്റെ സാന്നിധ്യം മൈതാനത്ത് ടീമിന് നൽകുന്ന ആത്മവിശ്വാസം വലുതാണെന്ന് ജയവർധനെ ചൂണ്ടിക്കാട്ടി. രോഹിത്തിനെപ്പോലൊരു മുതിർന്ന താരം മുഴുവൻ സമയവും ടീമിനൊപ്പം മൈതാനത്തുണ്ടാകുന്നത് തന്ത്രപരമായ നീക്കങ്ങൾക്കും യുവതാരങ്ങൾക്കും വലിയ കരുത്താകുമെന്നാണ് ടീം മാനേജ്മെന്റിന്റെ പ്രതീക്ഷ.
Story Summary:
Mumbai Indians head coach Mahela Jayawardene has confirmed that Rohit Sharma will not be limited to an ‘Impact Player’ role in the upcoming IPL season. Unlike the 2025 season where his workload was managed due to fitness concerns, the ‘Hitman’ is expected to be on the field full-time. Jayawardene emphasized that Rohit’s presence throughout the game will significantly boost the team’s dynamics.
