ഹൈദരാബാദ്: തെന്നിന്ത്യൻ സിനിമാ ലോകം ആകാംക്ഷയോടെ കാത്തിരുന്ന രശ്മിക മന്ദാന – വിജയ് ദേവരകൊണ്ട വിവാഹം ഫെബ്രുവരി 26-ന് ഉദയ്പൂരിൽ വെച്ച് നടക്കുമെന്ന് റിപ്പോർട്ട് (Rashmika Mandanna Vijay Deverakonda Wedding). അടുത്ത ബന്ധുക്കളും സുഹൃത്തുക്കളും മാത്രം പങ്കെടുക്കുന്ന സ്വകാര്യ ചടങ്ങായിരിക്കും ഇത്. ഫെബ്രുവരി 24-ന് ആരംഭിച്ച് 26-ന് വിവാഹത്തോടെ ചടങ്ങുകൾ അവസാനിക്കുമെന്നാണ് വിവരം. വിവാഹത്തിന് സിനിമാ വ്യവസായത്തിൽ നിന്നുള്ള സഹപ്രവർത്തകർക്ക് ക്ഷണമില്ലെന്നാണ് സൂചന.
വിവാഹ ചടങ്ങിന്റെ സ്വകാര്യത കാത്തുസൂക്ഷിക്കുന്നതിനായി അതിഥികൾക്ക് കർശനമായ ‘നോ-ഫോൺ’നയം ഏർപ്പെടുത്തിയിട്ടുണ്ട്. വിവാഹ ചിത്രങ്ങൾ പകർത്തുന്ന ടീം ഇതുമായി ബന്ധപ്പെട്ട നിയമപരമായ കരാറുകളിൽ ഒപ്പിട്ടിട്ടുണ്ടെന്നും റിപ്പോർട്ടുകൾ വ്യക്തമാക്കുന്നു. വിവാഹത്തിന് ശേഷം ഏകദേശം ഒരു മാസക്കാലം ഇരുവരും സിനിമയിൽ നിന്ന് വിട്ടുനിൽക്കുമെന്നാണ് അറിയുന്നത്.
ഉദയ്പൂരിലെ ചടങ്ങുകൾ സ്വകാര്യമാണെങ്കിലും, സിനിമാ മേഖലയിലുള്ളവർക്കും സുഹൃത്തുക്കൾക്കുമായി മാർച്ച് 4-ന് ഹൈദരാബാദിൽ വെച്ച് വിപുലമായ റിസപ്ഷൻ സംഘടിപ്പിക്കാൻ സാധ്യതയുണ്ട്. 2025 ഒക്ടോബറിൽ ഇരുവരും രഹസ്യമായി നിശ്ചയിച്ചതായി നേരത്തെ വാർത്തകൾ വന്നിരുന്നു. ഗീത ഗോവിന്ദം, ഡിയർ കോമ്രേഡ് എന്നീ ചിത്രങ്ങളിലെ ഇരുവരുടെയും കെമിസ്ട്രി വലിയ തോതിൽ ശ്രദ്ധിക്കപ്പെട്ടിരുന്നു.
