സുന്ദർഗഡ്: ഒഡീഷയിലെ സുന്ദർഗഡ് ജില്ലയിൽ ഏഴുവയസ്സുകാരിയെ ക്രൂരമായി പീഡിപ്പിച്ചു കൊലപ്പെടുത്തിയ സംഭവത്തിൽ 24-കാരനായ അയൽവാസി പിടിയിൽ (Odisha Child Abuse Murder). മൈക്കൽ കിൻഡോ എന്ന യുവാവാണ് അറസ്റ്റിലായത്. കാണാതായ പെൺകുട്ടിയുടെ മൃതദേഹം വനത്തിനുള്ളിലെ കല്ല് ക്വാറിയിൽ ഒളിപ്പിച്ച നിലയിൽ പോലീസ് കണ്ടെത്തുകയായിരുന്നു.
മാൽഡിഹി പഞ്ചായത്തിലെ ദുധി ഗ്രാമത്തിലാണ് നാടിനെ നടുക്കിയ സംഭവം നടന്നത്. മാർച്ച് 9-ന് വീടിന് സമീപം കളിച്ചുകൊണ്ടിരിക്കെയാണ് രണ്ടാം ക്ലാസ് വിദ്യാർത്ഥിനിയായ പെൺകുട്ടിയെ കാണാതായത്. കുട്ടിയുടെ പിതാവ് മറ്റൊരു സംസ്ഥാനത്ത് ജോലി ചെയ്യുന്നതിനാൽ അമ്മാവന്റെ വീട്ടിലായിരുന്നു താമസം. നാട്ടുകാരും വീട്ടുകാരും ചേർന്ന് തിരച്ചിൽ നടത്തിയെങ്കിലും കണ്ടെത്താനായില്ല. തുടർന്ന് മാർച്ച് 10-ന് അമ്മാവൻ രാജ്ഗംഗ്പൂർ പോലീസ് സ്റ്റേഷനിൽ പരാതി നൽകി.
അന്വേഷണത്തിനിടെ സംശയം തോന്നിയ പോലീസ് മൈക്കൽ കിൻഡോയെ നിരീക്ഷിച്ചു വരികയായിരുന്നു. പോലീസും സ്നിഫർ ഡോഗ് സംഘവും ഗ്രാമത്തിലെത്തിയതോടെ രക്ഷപ്പെടാൻ ശ്രമിച്ച ഇയാളെ പോലീസ് പിടികൂടി. ചോദ്യം ചെയ്യലിൽ കുട്ടിക്ക് മിഠായിയോ മറ്റോ നൽകി വനത്തിലേക്ക് കൊണ്ടുപോയെന്നും പീഡിപ്പിച്ച ശേഷം ശ്വാസം മുട്ടിച്ച് കൊലപ്പെടുത്തിയെന്നും പ്രതി സമ്മതിച്ചു. തുടർന്ന് കാട്ടിലെ ക്വാറിയിൽ മൃതദേഹം വലിയ കല്ലുകൾക്കിടയിൽ ഒളിപ്പിക്കുകയായിരുന്നു. സുന്ദർഗഡ് എസ്പി അമൃത്പാൽ കൗറിന്റെ നേതൃത്വത്തിലുള്ള സംഘം സ്ഥലത്തെത്തിയാണ് മൃതദേഹം പുറത്തെടുത്തത്. പോസ്റ്റ്മോർട്ടം നടപടികൾക്ക് ശേഷം മൃതദേഹം ബന്ധുക്കൾക്ക് വിട്ടുനൽകും. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
Summary: A 24-year-old man, Michael Kindo, was arrested in Odisha’s Sundergarh for the rape and murder of a seven-year-old girl. The victim went missing on March 9, and her body was later recovered from a stone quarry in a forest based on the accused’s confession.
