മുംബൈ: മുംബൈയിലെ ദഹിസറിൽ ഒന്നര വയസ്സുകാരിയെ തട്ടിക്കൊണ്ടുപോയി ലൈംഗികമായി പീഡിപ്പിച്ച സംഭവത്തിൽ 25-കാരനായ ബന്ധുവിനെ പോലീസ് അറസ്റ്റ് ചെയ്തു (Mumbai Dahisar Toddler Assault Case). ഫെബ്രുവരി 10-ന് പുലർച്ചെ കുട്ടിയെ വീട്ടിൽ കാണാതായതിനെ തുടർന്ന് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. കുട്ടിയുടെ വീടിനടുത്ത് താമസിക്കുന്ന പിതാവിന്റെ ബന്ധുവായ യുവാവാണ് ക്രൂരകൃത്യം നടത്തിയത്.
കുട്ടിയെ കാണാതായ ഉടൻ മാതാപിതാക്കൾ പോലീസിൽ പരാതി നൽകുകയും സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ പ്രതിയെ തിരിച്ചറിയുകയുമായിരുന്നു. ദഹിസറിലെ വിജനമായ സ്ഥലത്തെ തോടിന് സമീപത്ത് നിന്നാണ് കുട്ടിയെ പോലീസ് കണ്ടെത്തിയത്. ഗുരുതരമായി പരിക്കേറ്റ കുട്ടിയെ ഉടൻ തന്നെ നഗരസഭ ആശുപത്രിയിൽ പ്രവേശിപ്പിച്ചു. തനിക്ക് അറിയാവുന്ന ആൾ തന്നെയാണ് മകളെ ഉപദ്രവിച്ചതെന്നും കടുത്ത ശിക്ഷ നൽകണമെന്നും പിതാവ് പ്രതികരിച്ചു. സംഭവത്തിൽ മഹാരാഷ്ട്ര ഉപമുഖ്യമന്ത്രി ഏകനാഥ് ഷിൻഡെ ഇടപെടുകയും കുട്ടിക്ക് മികച്ച ചികിത്സ ഉറപ്പാക്കാൻ നിർദ്ദേശിക്കുകയും ചെയ്തു. പ്രതിക്കെതിരെ ബിഎൻഎസ്, പോക്സോ നിയമപ്രകാരമുള്ള കടുത്ത വകുപ്പുകൾ ചുമത്തിയിട്ടുണ്ട്.
Summary: A 25-year-old relative was arrested in Mumbai’s Dahisar for the kidnapping and sexual assault of a one-and-a-half-year-old girl.
