ന്യൂഡൽഹി: ഡൽഹി രാംലീല മൈതാനത്തിന് സമീപമുള്ള തുർക്ക്മാൻ ഗേറ്റിലെ അനധികൃത കയ്യേറ്റങ്ങൾ ഒഴിപ്പിക്കാനുള്ള നീക്കം വൻ സംഘർഷത്തിൽ കലാശിച്ചു. പ്രതിഷേധക്കാർ നടത്തിയ കല്ലേറിൽ അഞ്ച് പോലീസ് ഉദ്യോഗസ്ഥർക്ക് പരിക്കേറ്റു. സ്ഥിതിഗതികൾ നിയന്ത്രിക്കാൻ പോലീസ് കണ്ണീർവാതകം പ്രയോഗിച്ചു.(Massive clash during evacuation in Delhi, 5 policemen injured)
ഡൽഹി ഹൈക്കോടതി ഉത്തരവിനെത്തുടർന്ന് മുനിസിപ്പൽ കോർപ്പറേഷൻ ഓഫ് ഡൽഹി (MCD) ബുധനാഴ്ച പുലർച്ചെയാണ് പൊളിക്കൽ നടപടികൾ ആരംഭിച്ചത്. സയ്യിദ് ഫൈസ് എലാഹി പള്ളിക്കും ശ്മശാനത്തിനും സമീപമുള്ള ഭൂമിയിലെ അനധികൃത നിർമ്മാണങ്ങൾ നീക്കം ചെയ്യാനായിരുന്നു നീക്കം.
ഒഴിപ്പിക്കൽ തടയാൻ ശ്രമിച്ച പ്രാദേശിക നിവാസികൾ ഉദ്യോഗസ്ഥർക്ക് നേരെ കല്ലെറിയുകയായിരുന്നു. ഇതോടെയാണ് പോലീസ് ബലംപ്രയോഗിച്ചത്. ജനങ്ങൾക്ക് ബുദ്ധിമുട്ടുണ്ടാകാതിരിക്കാനാണ് പുലർച്ചെ ഒഴിപ്പിക്കൽ ആരംഭിച്ചതെന്ന് മുതിർന്ന പോലീസ് ഉദ്യോഗസ്ഥൻ നിധിൻ വാൾസൻ അറിയിച്ചു. അക്രമത്തിൽ പങ്കെടുത്തവർക്കെതിരെ കർശന നടപടിയുണ്ടാകുമെന്നും നിലവിൽ സ്ഥിതി നിയന്ത്രണവിധേയമാണെന്നും അദ്ദേഹം കൂട്ടിച്ചേർത്തു.
രാംലീല മൈതാനത്തിന് സമീപത്തെ 38,940 ചതുരശ്ര അടി വിസ്തീർണ്ണമുള്ള അനധികൃത കയ്യേറ്റങ്ങൾ മൂന്ന് മാസത്തിനകം ഒഴിപ്പിക്കാൻ 2025 നവംബറിൽ ഹൈക്കോടതി ഡിവിഷൻ ബെഞ്ച് ഉത്തരവിട്ടിരുന്നു. ഇതിന്റെ അടിസ്ഥാനത്തിലാണ് 17 ബുൾഡോസറുകൾ ഉപയോഗിച്ച് എംസിഡി നടപടി തുടങ്ങിയത്.