ന്യൂഡൽഹി: ഇൻസ്റ്റാഗ്രാം റീൽസിനായി നടുറോഡിൽ അപകടകരമായ അഭ്യാസപ്രകടനങ്ങൾ നടത്തിയ 22-കാരനെ ഡൽഹി പൊലീസ് അറസ്റ്റ് ചെയ്തു. വടക്കുകിഴക്കൻ ഡൽഹിയിലെ ഖജൂരി ഖാസ് സ്വദേശിയായ തുഷാർ പുനിയയാണ് പിടിയിലായത്. തിരക്കേറിയ റോഡുകളിലൂടെ ബൈക്കിൽ സഞ്ചരിച്ച്, ഓടിക്കൊണ്ടിരിക്കുന്ന ഡിടിസി ബസ്സുകളുടെയടക്കം വാതിലുകൾ തുറന്നായിരുന്നു യുവാവിന്റെ പരാക്രമം.(Man who opened doors of buses for viral reels arrested by Delhi Police)
ഫെബ്രുവരി 16-നാണ് തുഷാർ ചിത്രീകരിച്ച വീഡിയോ സമൂഹമാധ്യമങ്ങളിൽ വൈറലായത്. രജിസ്ട്രേഷൻ നമ്പറില്ലാത്ത ബൈക്കിലെത്തി ഡിടിസി ബസ്, മിനി വാൻ, കാറുകൾ എന്നിവയുടെ ഡോറുകൾ ഓട്ടത്തിനിടയിൽ തുറന്നു വിടുന്നതായിരുന്നു ദൃശ്യങ്ങൾ.
പൊതുജനങ്ങളുടെ സുരക്ഷയ്ക്ക് ഭീഷണിയായതോടെ ഡൽഹി പൊലീസ് അന്വേഷണം ഊർജിതമാക്കി. മേഖലയിലെ സിസിടിവി ദൃശ്യങ്ങൾ പരിശോധിച്ച് നടത്തിയ നീക്കത്തിലാണ് യുവാവിനെ പിടികൂടിയത്. അഭ്യാസത്തിനായി ഉപയോഗിച്ച ബൈക്കും പൊലീസ് കസ്റ്റഡിയിലെടുത്തു.
