ശ്രീനഗർ: ജമ്മു കശ്മീരിലെ രജൗരി ജില്ലയിലുണ്ടായ ശക്തമായ മിന്നൽ പ്രളയത്തിൽ വ്യാപക നാശനഷ്ടം. ശനിയാഴ്ച വൈകുന്നേരം മുതൽ രാത്രിയിലുടനീളം പെയ്ത കനത്ത മഴയെത്തുടർന്ന് നദികൾ കരകവിഞ്ഞൊഴുകിയതോടെ ടൗണിന്റെ ഭൂരിഭാഗം പ്രദേശങ്ങളും വെള്ളത്തിനടിയിലായി. പ്രളയത്തിലും മഴക്കെടുതിയിലുമായി ഇതുവരെ നാല് പേർ മരണപ്പെട്ടതായാണ് ഔദ്യോഗിക വിവരം. താഴ്ന്ന പ്രദേശങ്ങളിൽ താമസിക്കുന്ന നൂറുകണക്കിന് ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു.(Jammu Kashmir Rajouri Flash Floods Four Dead Chief Minister Omar Abdullah Returns)
പുതിയ ബസ് സ്റ്റാൻഡ് ഉൾപ്പെടെയുള്ള നഗര ഹൃദയങ്ങളിൽ വെള്ളം കയറിയതോടെ നിരവധി വാഹനങ്ങൾ ഒഴുക്കിൽപ്പെടുകയോ മുങ്ങിപ്പോകുകയോ ചെയ്തിട്ടുണ്ട്. പ്രളയത്തിൽ ഒറ്റപ്പെട്ടുപോയ കുടുംബങ്ങളെ ജില്ലാ ഭരണകൂടത്തിന്റെ നേതൃത്വത്തിൽ ദുരൂഹസാശ്വാസ പ്രവർത്തകർ രക്ഷപ്പെടുത്തി വരികയാണ്. മിന്നൽ പ്രളയം പൊതു-സ്വകാര്യ മേഖലകളിൽ വലിയ നാശനഷ്ടമാണ് ഉണ്ടാക്കിയിരിക്കുന്നതെന്ന് പ്രാദേശിക കോൺഗ്രസ് എം.എൽ.എ. ഇഫ്തിഖാർ അഹമ്മദ് അറിയിച്ചു. നഗരത്തിലെ അബ്ദുള്ള പാലത്തിന് സമീപമുള്ള വീടുകളിൽ വെള്ളം കയറിയതിനെ തുടർന്ന് അമ്പതിലധികം കുടുംബങ്ങളെ അടിയന്തരമായി മാറ്റിപ്പാർപ്പിച്ചു. താരിഖ് പാലത്തിന് സമീപമുള്ള ജനങ്ങളെ പോലീസ് ഇടപെട്ടാണ് സുരക്ഷിത സ്ഥാനങ്ങളിലെത്തിച്ചത്. പ്രളയസാധ്യതാ മേഖലകളിൽ സന്ദർശനം നടത്തിയ പോലീസ് സംഘം നദീതീരങ്ങളിൽ ഉള്ളവർ ജാഗ്രത പാലിക്കണമെന്ന് നിർദേശം നൽകിയിട്ടുണ്ട്.
മേഖലയിലെ ഗുരുതര സാഹചര്യം കണക്കിലെടുത്ത് മുഖ്യമന്ത്രി ഒമർ അബ്ദുള്ള ഡൽഹിയിലെ ഔദ്യോഗിക പരിപാടികൾ റദ്ദാക്കി അടിയന്തരമായി ജമ്മുവിലേക്ക് തിരിച്ചു. സ്ഥിതിഗതികൾ സൂക്ഷ്മമായി വിലയിരുത്തി വരികയാണെന്ന് അദ്ദേഹം വ്യക്തമാക്കി. പ്രളയത്തിൽ ഒരു സ്ത്രീയെ കാണാതായിട്ടുണ്ടെന്നും സർവതും നഷ്ടപ്പെട്ട അവസ്ഥയിലാണെന്നും പ്രദേശവാസികൾ പ്രതികരിച്ചു. അതേസമയം, ജമ്മു കശ്മീരിൽ ജൂലൈ 23 വരെ ശക്തമായ മഴ തുടരുമെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
Story Summary
Flash floods triggered by torrential overnight rains have caused widespread devastation in the Rajouri district of Jammu and Kashmir, claims four lives and forcing hundreds of residents to evacuate. As key parts of Rajouri town, including the new bus stand, remain submerged, Chief Minister Omar Abdullah cancelled his Delhi programs to return to Jammu, while the IMD predicts heavy rainfall to continue until July 23.
