പുരുലിയ: പശ്ചിമ ബംഗാളിൽ ബിജെപി അധികാരത്തിൽ വന്നാൽ ജനങ്ങളെ മത്സ്യം ഉൾപ്പെടെയുള്ള മാംസാഹാരങ്ങൾ കഴിക്കുന്നതിൽ നിന്ന് തടയുമെന്ന് മുഖ്യമന്ത്രി മമത ബാനർജി. ബിജെപി ഭരിക്കുന്ന സംസ്ഥാനങ്ങളിൽ പലയിടത്തും മത്സ്യം കഴിക്കാറില്ലെന്നും ബംഗാളിലും അത് നടപ്പിലാക്കാൻ അവർ ശ്രമിക്കുമെന്നും മമത ആരോപിച്ചു.(If BJP comes to power, it will not allow eating fish and meat, says Mamata Banerjee)
ബിജെപി ഭരിക്കുന്ന സംസ്ഥാനങ്ങളിൽ മത്സ്യം കഴിക്കാറില്ല. അവർ ഇവിടെ അധികാരത്തിൽ വന്നാൽ നിങ്ങൾക്ക് ഇറച്ചിയോ മുട്ടയോ കഴിക്കാൻ കഴിയില്ല. ബിജെപി ഏകപക്ഷീയമായ നിലപാടുകളുള്ള പാർട്ടിയാണ്. അവർക്ക് ഒരു മതത്തിലും വിശ്വാസമില്ല. കലാപങ്ങൾ ഉണ്ടാക്കി അധികാരം പിടിക്കാനാണ് അവർ ശ്രമിക്കുന്നത്. ആളുകളെ കൊന്നൊടുക്കിയാണ് അവർ ഭരണം നേടുന്നത്, മമത പറഞ്ഞു.
ബിജെപിക്കെതിരെ രൂക്ഷമായ ആക്രമണമാണ് മമത നടത്തിയത്. ഇതര സംസ്ഥാനങ്ങളിൽ ബംഗാളി സംസാരിക്കുന്നവർക്ക് നേരെ വലിയ തോതിൽ അതിക്രമങ്ങൾ നടക്കുന്നുണ്ടെന്നും അവർ ആരോപിച്ചു. സ്ത്രീപുരുഷഭേദമന്യേ ഗോത്രവർഗക്കാർക്കും സ്ത്രീകൾക്കും നേരെ ഏറ്റവും കൂടുതൽ ആക്രമണങ്ങൾ നടക്കുന്നത് ബിജെപി ഭരിക്കുന്ന സംസ്ഥാനങ്ങളിലാണെന്ന് മമത ചൂണ്ടിക്കാട്ടി. ഇതര സംസ്ഥാനങ്ങളിലെ ബംഗാളി കുടിയേറ്റ തൊഴിലാളികൾക്ക് നേരെയുള്ള ആക്രമണങ്ങൾ തൃണമൂൽ കോൺഗ്രസ് മുൻപും രാഷ്ട്രീയ ആയുധമാക്കിയിരുന്നു. 2026-ലെ നിയമസഭാ തിരഞ്ഞെടുപ്പിലും ഇത് പ്രധാന ചർച്ചാവിഷയമായി മാറിയിരിക്കുകയാണ്. പശ്ചിമ ബംഗാളിൽ രണ്ട് ഘട്ടങ്ങളിലായാണ് വോട്ടെടുപ്പ് നടക്കുന്നത്.
