അഹമ്മദാബാദ്: ഗുജറാത്തിലെ പ്രമുഖ റിയൽ എസ്റ്റേറ്റ് ഏജന്റ് തുഷാർ ഗേലാനി (58) അന്തരിച്ചു (Surat Real Estate Agent death). മകളുടെ വിവാഹ ഒരുക്കങ്ങൾക്കിടെ സ്വയം വെടിവെച്ച് പരിക്കേറ്റ് ചികിത്സയിലായിരുന്ന ഇദ്ദേഹം, വിവാഹ ദിനമായ ഫെബ്രുവരി അഞ്ചിനാണ് ആശുപത്രിയിൽ വെച്ച് മരിച്ചത്. ഹൃദയാഘാതമാണ് മരണകാരണമെന്ന് ഡോക്ടർമാർ അറിയിച്ചു.
ഫെബ്രുവരി ഒന്നിനാണ് ഗേലാനി സ്വന്തം വീട്ടിൽ വെച്ച് ലൈസൻസുള്ള റിവോൾവർ ഉപയോഗിച്ച് തലയ്ക്ക് വെടിവെച്ചത്. വെടിയൊച്ച കേട്ടെത്തിയ ബന്ധുക്കൾ ഉടൻ തന്നെ ഇദ്ദേഹത്തെ സ്വകാര്യ ആശുപത്രിയിൽ എത്തിക്കുകയായിരുന്നു. തലയ്ക്ക് ഗുരുതരമായി പരിക്കേറ്റതിനെ തുടർന്ന് തീവ്രപരിചരണ വിഭാഗത്തിൽ ചികിത്സയിലായിരുന്നു. ശസ്ത്രക്രിയയ്ക്ക് ശേഷം ആരോഗ്യനിലയിൽ നേരിയ പുരോഗതി കണ്ടിരുന്നെങ്കിലും വിവാഹ ദിവസം ഹൃദയാഘാതം സംഭവിക്കുകയായിരുന്നു.
സൂറത്തിലെ വലിയ വാണിജ്യ-താമസ സമുച്ചയങ്ങളുടെ നിർമ്മാണവുമായി ബന്ധപ്പെട്ട് പ്രവർത്തിച്ചിരുന്ന തുഷാർ ഗേലാനി മേഖലയിലെ അറിയപ്പെടുന്ന വ്യക്തിത്വമായിരുന്നു. ആത്മഹത്യാ ശ്രമത്തിലേക്ക് നയിച്ച കാരണം വ്യക്തമല്ല. സാമ്പത്തിക ബാധ്യതകളോ മറ്റെന്തെങ്കിലും സമ്മർദ്ദങ്ങളോ ഉണ്ടായിരുന്നോ എന്ന് പോലീസ് അന്വേഷിച്ചു വരികയാണ്. വിവാഹ ആഘോഷങ്ങൾക്കിടെ നടന്ന ഈ വേർപാട് കുടുംബത്തെയും സഹപ്രവർത്തകരെയും വലിയ ദുഃഖത്തിലാഴ്ത്തി.
