ബീഡ്: ഒന്നര ലക്ഷം രൂപയുടെ കടബാധ്യതയെച്ചൊല്ലിയുള്ള തർക്കത്തെത്തുടർന്ന് സ്വന്തം സുഹൃത്തിനെ വിവാഹത്തിന് മണിക്കൂറുകൾക്ക് മുമ്പ് കൊലപ്പെടുത്തിയ വരൻ മഹാരാഷ്ട്രയിലെ ബീഡ് ജില്ലയിൽ പിടിയിലായി (Groom kills friend over debt). ചന്ദ് എന്ന ഗുഡു തംബോളി (30) ആണ് കൊല്ലപ്പെട്ടത്. പ്രതിയായ ആതിഖ് തംബോളിയെ പോലീസ് അറസ്റ്റ് ചെയ്തു. തിങ്കളാഴ്ച രാവിലെ ഷിരൂർ കാസർ തെഹ്സിലിലെ ഖോകർമോ ഗ്രാമത്തിന്റെ അതിർത്തിയിലാണ് ചന്ദിന്റെ മൃതദേഹം തല തകർന്ന നിലയിൽ കണ്ടെത്തിയത്.
ആതിഖ് ഒന്നര ലക്ഷം രൂപ ചന്ദിൽ നിന്ന് കടം വാങ്ങിയിരുന്നു. വിവാഹദിവസമായ തിങ്കളാഴ്ച പണം തിരികെ നൽകിയില്ലെങ്കിൽ വിവാഹ പന്തലിലെത്തി ബഹളമുണ്ടാക്കുമെന്ന് ചന്ദ് ഭീഷണിപ്പെടുത്തിയിരുന്നു. ഇതേത്തുടർന്ന് സമൂഹത്തിന് മുന്നിൽ താൻ അപമാനിക്കപ്പെടുമെന്ന് ഭയന്ന ആതിഖ് സുഹൃത്തിനെ വകവരുത്താൻ തീരുമാനിക്കുകയായിരുന്നു. ഞായറാഴ്ച രാത്രി ചന്ദിനെ വിജനമായ സ്ഥലത്തേക്ക് വിളിച്ചുവരുത്തിയ ആതിഖ്, കല്ല് കൊണ്ട് തലയ്ക്കടിച്ചു കൊലപ്പെടുത്തിയ ശേഷം ഒളിവിൽ പോകുകയായിരുന്നു.
മൃതദേഹം കണ്ടെത്തിയതിനെത്തുടർന്ന് പോലീസ് നടത്തിയ അന്വേഷണത്തിൽ സാങ്കേതിക നിരീക്ഷണത്തിലൂടെയും പ്രാദേശിക വിവരങ്ങളിലൂടെയുമാണ് ആതിഖിനെ തിങ്കളാഴ്ച രാത്രിയോടെ ബീഡ് നഗരത്തിൽ നിന്ന് പിടികൂടിയത്. വിവാഹ പന്തലിൽ വരനായി എത്തേണ്ടിയിരുന്ന യുവാവ് ഇപ്പോൾ കൊലപാതകക്കേസിൽ അഴികൾക്കുള്ളിലാണ്. കേസിൽ കൂടുതൽ അന്വേഷണം നടന്നുവരികയാണെന്ന് പോലീസ് അറിയിച്ചു.
Summary: A groom in Maharashtra’s Beed district was arrested for allegedly killing his friend just hours before his wedding, fearing the friend would disrupt the ceremony over an unpaid debt of Rs 1.5 lakh.
