ന്യൂഡൽഹി: പാർലമെന്റ് മന്ദിരത്തിനും ഡൽഹിയിലെ പത്തോളം പ്രമുഖ സ്കൂളുകൾക്കും നേരെ ബോംബ് ഭീഷണി. ‘ഖലിസ്താൻ നാഷണൽ ആർമി’യുടെ പേരിൽ ലഭിച്ച ഇമെയിൽ സന്ദേശത്തെത്തുടർന്ന് ഡൽഹിയിൽ അതീവ ജാഗ്രത പ്രഖ്യാപിച്ചു. ഫെബ്രുവരി 13-ന് ഉച്ചയ്ക്ക് 1.11-ന് പാർലമെന്റിൽ സ്ഫോടനം നടത്തുമെന്നാണ് ഭീഷണി.(Delhi will become Khalistan, High alert after bomb threats to Parliament and schools)
ഫെബ്രുവരി 13-ന് കൃത്യം 1.11-ന് സ്ഫോടനം ഉണ്ടാകുമെന്ന് സന്ദേശത്തിൽ പറയുന്നു.അഫ്സൽ ഗുരുവിന്റെ ഓർമ്മയ്ക്കായി ഡൽഹി ‘ഖലിസ്ഥാൻ’ ആക്കുമെന്നും ഇമെയിലിൽ അവകാശപ്പെടുന്നു. പാർലമെന്റിന് പുറമെ ഡൽഹിയിലെ 10 വിദ്യാലയങ്ങളിലും സ്ഫോടനം നടത്തുമെന്ന് മുന്നറിയിപ്പുണ്ട്.
ഇന്ന് രാവിലെ എട്ട് മണിയോടെയാണ് പോലീസിന് ഇമെയിൽ ലഭിച്ചത്. ഭീഷണി സന്ദേശമെത്തിയതിന് പിന്നാലെ ഡൽഹി പോലീസ്, അഗ്നിശമന സേന, ബോംബ് സ്ക്വാഡ് എന്നിവർ ചേർന്ന് ബാധിക്കപ്പെട്ട സ്ഥലങ്ങളിൽ വ്യാപക പരിശോധന ആരംഭിച്ചു.സൗത്ത് ഡൽഹിയിലെ ലോധി റോഡ് എയർഫോഴ്സ് സ്കൂൾ, കെ.ആർ. മംഗലം സ്കൂൾ, സാദിഖ് നഗറിലെ ദി ഇന്ത്യൻ സ്കൂൾ എന്നിവയുൾപ്പെടെയുള്ള സ്ഥാപനങ്ങളിലാണ് ഭീഷണി എത്തിയത്.
