മംഗളൂരു: പശ്ചിമേഷ്യയിലെ യുദ്ധസാഹചര്യം മൂലം ഇന്ത്യയിൽ അനുഭവപ്പെട്ട കനത്ത പാചകവാതക ക്ഷാമത്തിന് പരിഹാരമായി അമേരിക്കയിൽ നിന്നുള്ള എൽ.പി.ജി കപ്പൽ മംഗളൂരു തുറമുഖത്തെത്തി. ടെക്സസിലെ നെദർലാൻഡ് തുറമുഖത്ത് നിന്ന് ദ്രവീകൃത പെട്രോളിയം വാതകവുമായി പുറപ്പെട്ട ‘പിക്സിസ് പയനിയർ’ എന്ന ചരക്ക് കപ്പലാണ് ഞായറാഴ്ച രാവിലെ നങ്കൂരമിട്ടത്.(Cargo ship Pyxis Pioneer, carrying LPG from US, arrives at Mangalore Port
കണക്കനുസരിച്ച് സിംഗപ്പൂർ പതാകയുള്ള ഈ ടാങ്കർ രാവിലെ 6 മണിയോടെ ബെർത്ത് നമ്പർ 13-ലാണ് എത്തിയത്. 47,236 മെട്രിക് ടൺ ഭാരമുള്ള കപ്പലിൽ നിന്ന് 16,714 ടൺ എൽ.പി.ജി തിങ്കളാഴ്ച പുലർച്ചെ കൈമാറും. ഫെബ്രുവരി 14-ന് ടെക്സസിൽ നിന്ന് പുറപ്പെട്ട കപ്പൽ നീണ്ട യാത്രയ്ക്കൊടുവിലാണ് ഇന്ത്യയിലെത്തിയത്.
പശ്ചിമേഷ്യയിലെ മൂന്നാഴ്ച നീണ്ടുനിന്ന സംഘർഷം ഇന്ത്യയിലേക്കുള്ള ഊർജ്ജ വിതരണത്തെ സാരമായി ബാധിച്ചിരുന്നു. ഹോർമുസ് കടലിടുക്ക് വഴിയുള്ള ചരക്കുനീക്കം തടസ്സപ്പെട്ടതോടെയാണ് ഇന്ത്യ അമേരിക്കയുൾപ്പെടെയുള്ള ഇതര രാജ്യങ്ങളെ ആശ്രയിച്ചു തുടങ്ങിയത്. ഇതിന്റെ ഭാഗമായി കഴിഞ്ഞ ദിവസങ്ങളിൽ കൂടുതൽ കപ്പലുകൾ ഇന്ത്യൻ തീരത്തെത്തിയിട്ടുണ്ട്.
