ഹമീർപൂർ: ഹിമാചൽ പ്രദേശിലെ ഹമീർപുരിൽ 14 വയസ്സുകാരന്റെ ക്രൂരമായ ലൈംഗികാതിക്രമത്തിനിരയായ 40-കാരി ചികിത്സയിലിരിക്കെ മരിച്ചു. ഇതിന് പിന്നാലെ ശക്തമായ പ്രതിഷേധവുമായി ബന്ധുക്കളും നാട്ടുകാരും രംഗത്തെത്തി. മരിച്ച യുവതിയുടെ മൃതദേഹവുമായി ദേശീയപാത ഉപരോധിച്ചാണ് ഇവർ പ്രതിഷേധിച്ചത്.(Brutal sexual assault by 14-year-old, 40-year-old dies after being seriously injured)
പ്രതിഷേധക്കാർ ഞായറാഴ്ച മൂന്ന് മണിക്കൂറിലേറെയാണ് ഹമീർപൂർ ദേശീയ പാത ഉപരോധിച്ചത്. 14-കാരനായ പ്രതിക്കെതിരെ കർശന നടപടി വേണമെന്ന് അവർ ആവശ്യപ്പെട്ടു. ഉപരോധത്തെ തുടർന്ന് ഹിമാചൽ പ്രദേശ് മുഖ്യമന്ത്രി സുഖ്വിന്ദർ സിംഗ് സുഖു വിഷയത്തിൽ നേരിട്ട് ഇടപെട്ടു. അദ്ദേഹം 40-കാരിയുടെ ബന്ധുക്കളോട് സംസാരിക്കുകയും നീതി നടപ്പിലാക്കുമെന്ന് ഉറപ്പുനൽകുകയും ചെയ്തു.
നവംബർ 3-നാണ് ഹമീർപൂരിലെ സാസൻ ഗ്രാമത്തിൽ ക്രൂരമായ സംഭവം നടന്നത്. വീടിന് സമീപത്തെ പാടത്ത് പുല്ലുവെട്ടുകയായിരുന്ന 40-കാരിയെ ഒമ്പതാം ക്ലാസുകാരനായ 14-കാരൻ പീഡിപ്പിക്കുകയായിരുന്നു. ക്രൂരമായ ബലാത്സംഗത്തിനിടെ യുവതി പ്രതിരോധിക്കാൻ ശ്രമിച്ചു. ഈ സമയം അരിവാളും വടിയും ഉപയോഗിച്ച് 14-കാരൻ യുവതിയെ ആക്രമിച്ചു.
ഗുരുതരമായി പരിക്കേറ്റ് വയലിൽ കിടന്ന യുവതിയെ നാട്ടുകാരാണ് ആശുപത്രിയിലെത്തിച്ചത്. ചണ്ഡിഗഢിലെ ആശുപത്രിയിൽ ചികിത്സയിലിരിക്കെ അഞ്ച് ദിവസത്തിന് ശേഷം വെള്ളിയാഴ്ചയാണ് 40-കാരി മരണപ്പെട്ടത്. കുറ്റം സമ്മതിച്ച 14-കാരൻ നിലവിൽ ജുവനൈൽ ഹോമിലാണ് ഉള്ളത്.