ബെംഗളൂരു: ബെംഗളൂരുവിലെ ആർ.കെ ഹെഗ്ഡെ നഗറിൽ സ്കൂൾ ബസ് സ്കൂട്ടറിലിടിച്ചുണ്ടായ അപകടത്തിൽ നാല് വയസ്സുകാരിയും രണ്ട് വയസ്സുകാരിയും മരിച്ചു (Bengaluru Accident). പോലീസ് കോൺസ്റ്റബിളിനൊപ്പം പാൽ വാങ്ങാൻ പോകുന്നതിനിടെയാണ് പിഞ്ചുകുഞ്ഞുങ്ങൾ അപകടത്തിൽപ്പെട്ടത്.
ബുധനാഴ്ച രാവിലെ 8:15 ഓടെ ആർ.കെ ഹെഗ്ഡെ നഗറിലെ പോലീസ് ക്വാർട്ടേഴ്സിന് സമീപമാണ് അപകടം നടന്നത്. ഹെന്നൂർ പോലീസ് സ്റ്റേഷൻ പരിധിയിലാണ് ഈ പ്രദേശം. സിറ്റി ആംഡ് റിസർവ് (CAR) വിഭാഗത്തിലെ കോൺസ്റ്റബിൾ നാഗനഗൗഡയുടെ മകൾ വർഷ (2), അദ്ദേഹത്തിന്റെ സഹോദരപുത്രി ഭാനു (4) എന്നിവരാണ് മരിച്ചത്.
കുട്ടികളുമായി സ്കൂട്ടറിൽ പാൽ വാങ്ങാൻ പോകുകയായിരുന്നു കോൺസ്റ്റബിൾ. ഇതിനിടെ എതിർദിശയിൽ നിന്ന് തിരിഞ്ഞു വന്ന സ്വകാര്യ സ്കൂൾ ബസ് സ്കൂട്ടറിലിടിച്ചു. കുട്ടികൾ റോഡിലേക്ക് തെറിച്ചു വീഴുകയും ബസ് അവരുടെ ശരീരത്തിലൂടെ കയറിയിറങ്ങുകയുമായിരുന്നു. ഇരുവരും സംഭവസ്ഥലത്തുതന്നെ മരിച്ചു. നാഗനഗൗഡ നിസാര പരിക്കുകളോടെ രക്ഷപ്പെട്ടു.
അപകടത്തിന് പിന്നാലെ ബസ് ഡ്രൈവറെ പോലീസ് അറസ്റ്റ് ചെയ്തു. അശ്രദ്ധമായി വാഹനമോടിച്ച് മരണത്തിന് കാരണമായതിന് ഡ്രൈവർക്കെതിരെ കേസെടുത്തിട്ടുണ്ട്.
