മുംബൈ: മഹാരാഷ്ട്ര മുൻ ഉപമുഖ്യമന്ത്രി അജിത് പവാറിന്റെ മരണത്തിന് കാരണമായ വിമാനാപകടത്തിൽ അട്ടിമറി സാധ്യത ആരോപിച്ച് രോഹിത് പവാർ എം.എൽ.എ (Ajit Pawar Plane Crash). വിമാനത്തിന്റെ സാങ്കേതിക രേഖകളിൽ കൃത്രിമം നടന്നതായും വ്യോമയാന നിയന്ത്രണ ഏജൻസിയായ ഡി.ജി.സി.എ (DGCA) പ്രതിക്കൂട്ടിലാണെന്നും അദ്ദേഹം എക്സ് (ട്വിറ്റർ) പ്ലാറ്റ്ഫോമിലൂടെ ആരോപിച്ചു.
അപകടത്തിൽപ്പെട്ട വിമാനത്തിന് 5000 മണിക്കൂർ പറക്കൽ ശേഷിയുണ്ടായിരുന്നുവെന്നാണ് കണക്ക്. എന്നാൽ വിമാനക്കമ്പനിയായ ‘വി.എസ്.ആർ’ രേഖപ്പെടുത്തിയത് 1800 മുതൽ 2000 മണിക്കൂർ മാത്രമാണ്. ബാക്കി വരുന്നത് ഏകദേശം 3000 മണിക്കൂർ എവിടെപ്പോയെന്ന് അദ്ദേഹം ചോദിച്ചു.
അജിത് പവാർ യാത്ര ചെയ്യുമ്പോൾ വിമാനത്തിന് കേവലം 10-15 മണിക്കൂർ പറക്കൽ ശേഷി മാത്രമേ ബാക്കിയുണ്ടായിരുന്നുള്ളൂ. യഥാർത്ഥത്തിൽ വിമാനം 8000 മണിക്കൂറിലധികം പറന്നിട്ടുണ്ടാകാമെന്നും രേഖകളിൽ കൃത്രിമം കാട്ടാൻ കമ്പനിക്ക് സമയം നൽകുന്നതിനാണോ അന്വേഷണം വൈകിപ്പിക്കുന്നതെന്നും അദ്ദേഹം ആരോപിച്ചു. വിദേശത്തുനിന്നും തിരിച്ചെത്തിയ കമ്പനി ഉടമയുടെ വിവരം സി.ഐ.ഡി.യെ അറിയിക്കുന്നതിൽ ഡി.ജി.സി.എ പരാജയപ്പെട്ടത് എന്തു കൊണ്ടാണെന്നും രോഹിത് പവാർ ചോദിച്ചു.
2026 ജനുവരി 28-നാണ് മുംബൈയിൽ നിന്നും ബാരാമതിയിലേക്കുള്ള യാത്രയ്ക്കിടെ അജിത് പവാർ സഞ്ചരിച്ച വിമാനം തകർന്നു വീണത്. അപകടത്തിൽ അജിത് പവാറിനെ കൂടാതെ സുരക്ഷാ ഉദ്യോഗസ്ഥൻ വിദിപ് ജാദവ്, അറ്റൻഡന്റ് പിങ്കി മാലി, പൈലറ്റ് സുമിത് കപൂർ, സഹപൈലറ്റ് ശംഭവി പതക് എന്നിവരും കൊല്ലപ്പെട്ടിരുന്നു. സംഭവത്തിൽ കേന്ദ്ര-സംസ്ഥാന സർക്കാരുകൾ സുതാര്യമായ അന്വേഷണം നടത്തണമെന്ന് രോഹിത് പവാർ ആവശ്യപ്പെട്ടു.
Story Summary: NCP (Sharad Pawar faction) leader Rohit Pawar alleged foul play in the plane crash that killed former Maharashtra Deputy CM Ajit Pawar. He claimed there were discrepancies in the flying hours’ records and questioned the role of DGCA and VSR aviation company. The crash occurred on Jan 28, 2026, while traveling from Mumbai to Baramati.
