ന്യൂഡൽഹി: ലണ്ടനിൽ നിന്ന് ബംഗളൂരുവിലേക്ക് പുറപ്പെടേണ്ടിയിരുന്ന എയർ ഇന്ത്യയുടെ ബോയിംഗ് 787 ഡ്രീംലൈനർ വിമാനം സാങ്കേതിക തകരാറിനെത്തുടർന്ന് സർവീസ് നടത്തിയില്ല (Air India London to Bengaluru Flight). എൻജിൻ സ്റ്റാർട്ട് ചെയ്യുന്ന സമയത്ത് ഇന്ധന നിയന്ത്രണ സ്വിച്ച് പ്രവർത്തനരഹിതമായതാണ് വിമാനം റദ്ദാക്കാൻ കാരണമായത്.
എൻജിൻ സ്റ്റാർട്ടപ്പിനിടെ സ്വിച്ച് ‘കട്ട് ഓഫ്’ (Cutoff) സ്ഥാനത്തേക്ക് നീങ്ങിയതായി പൈലറ്റ് കണ്ടെത്തുകയായിരുന്നു. ഇതോടെ സുരക്ഷാ മുൻകരുതലിന്റെ ഭാഗമായി യാത്ര റദ്ദാക്കി. സംഭവത്തെക്കുറിച്ച് എയർ ഇന്ത്യ ഏവിയേഷൻ റെഗുലേറ്ററായ ഡിജിസിഎയെ (DGCA) വിവരമറിയിച്ചു. തുടർന്ന് ഡിജിസിഎയുടെ നിർദ്ദേശപ്രകാരം എയർ ഇന്ത്യയുടെ കൈവശമുള്ള എല്ലാ ബോയിംഗ് 787 വിമാനങ്ങളിലെയും ഇന്ധന നിയന്ത്രണ സ്വിച്ചുകൾ അടിയന്തരമായി പരിശോധിച്ചു.
മറ്റ് വിമാനങ്ങളിൽ യാതൊരുവിധ സാങ്കേതിക പ്രശ്നങ്ങളും കണ്ടെത്തിയിട്ടില്ലെന്ന് എയർ ഇന്ത്യ വക്താവ് അറിയിച്ചു. യാത്രക്കാരുടെയും ജീവനക്കാരുടെയും സുരക്ഷയ്ക്കാണ് കമ്പനി പ്രഥമ പരിഗണന നൽകുന്നതെന്നും അദ്ദേഹം വ്യക്തമാക്കി.
യാത്ര മുടങ്ങിയവർക്ക് പകരം സംവിധാനങ്ങൾ ഏർപ്പെടുത്തിയതായും സാങ്കേതിക വിദഗ്ധർ വിമാനം വിശദമായി പരിശോധിച്ചു വരികയാണെന്നും അധികൃതർ കൂട്ടിച്ചേർത്തു.
