ചെന്നൈ: 2051 ആകുമ്പോഴേക്കും ചെന്നൈയിൽ ഇപ്പോഴുള്ളതിൻ്റെ മൂന്നിരട്ടി മാലിന്യം ഉത്പാദിപ്പിക്കും, അതിനെ മറികടക്കുക എന്നത് ഭാവി ചെന്നൈ കോർപ്പറേഷൻ ഭരണത്തിന് ഒരു ഹിമാലയൻ വെല്ലുവിളിയായിരിക്കുമെന്ന് വിദഗ്ധർ പറയുന്നു (Garbage in Chennai). ചെന്നൈ നഗരം ദിനംപ്രതി വളരുന്നതിനാൽ മാലിന്യം വലിയ പ്രശ്നമാണ്. നിരവധി കമ്പനികളും അവസരങ്ങളും ഉള്ളതിനാൽ പലരും ഇവിടെ സ്ഥിരതാമസമാക്കാൻ താൽപര്യം കാണിക്കുന്നുണ്ട്. ഇതുമൂലം ദിനംപ്രതിയുള്ള മാലിന്യങ്ങളും വൻതോതിൽ വർധിച്ചുവരികയാണ്. ഇത് കോർപറേഷൻ അധികൃതർക്ക് നിരന്തരം തലവേദനസൃഷ്ടിക്കുകയാണ്.
ജനങ്ങളുടെ ഇടയിൽ വർധിച്ച് വരുന്ന ഫാസ്റ്റ് ഫുഡ് ലൈഫും മാലിന്യ ഉൽപ്പാദനം വർധിക്കാനുള്ള പ്രധാന കാരണമായി മാറുന്നു.വീട്ടിൽ മാത്രം പാചകം ചെയ്യുന്ന കാലഘട്ടം മാറി, റെസ്റ്റോറൻ്റുകളിൽ നിന്ന് പാഴ്സലുകൾ വാങ്ങുന്നത് വർദ്ധിച്ചു. ഇതും മാലിന്യം പെരുകാനുള്ള പ്രധാന കാരണമാണെന്ന് അധികൃതർ പറയുന്നു. നഗരത്തിലെ മാലിന്യം ശുചീകരണ തൊഴിലാളികൾ ദിനം പ്രതി നീക്കം ചെയ്യുന്നുണ്ടെങ്കിലും, ഓരോ ദിവസവും പൊതുജനങ്ങൾ തള്ളുന്ന മാലിന്യത്തിന്റെ അളവ് വർധിച്ചു വരികയാണ്.
ശുചീകരണ തൊഴിലാളികൾ ദിനം പ്രതി നീക്കം ചെയ്യുന്ന മാലിന്യം ബയോഡീഗ്രേഡബിൾ, നോൺ-ബയോഡീഗ്രേഡബിൾ എന്നിങ്ങനെ രണ്ടായി തരംതിരിച്ച് മാലിന്യനിക്ഷേപ കേന്ദ്രങ്ങളിലേക്ക് കൊണ്ടുപോകുന്നു. കോർപറേഷൻ്റെ പെരുങ്കുടി, കൊടുങ്ങയ്യൂർ ഗോഡൗണുകളിൽ ബയോ മൈനിങ് രീതിയിലാണ് മാലിന്യം സംസ്കരിക്കുന്നത്. അനുവദനീയമായ സ്ഥലങ്ങൾ ഒഴികെയുള്ള പൊതുസ്ഥലങ്ങളിലോ , ജലാശയങ്ങൾക്ക് സമീപം നിർമാണ മാലിന്യം നിക്ഷേപിച്ചാൽ 500 രൂപ മുതൽ 5000 രൂപ വരെയാണ് പിഴ ചുമത്തുന്നത്.
നിലവിൽ ചെന്നൈ കോർപ്പറേഷൻ പ്രതിദിനം 5,900 ടൺ മാലിന്യമാണ് തള്ളുന്നത്. അടുത്ത 20 വർഷത്തിനുള്ളിൽ മാലിന്യ ഉൽപ്പാദനം മൂന്നിരട്ടിയായേക്കും, ചെന്നൈയിലെ മാലിന്യം പ്രതിദിനം 17,422 ടണ്ണായി ഉയരും. ചെന്നൈ കോർപ്പറേഷൻ കൂടുതൽ വിപുലീകരിച്ചാൽ ഉൽപാദിപ്പിക്കുന്ന മാലിന്യവും അതിനനുസരിച്ച് വർധിക്കുമെന്നും വിദഗ്ദർ ചൂണ്ടിക്കാട്ടുന്നു.
നഗരങ്ങളിൽ, പുനരുപയോഗം ചെയ്യാനാവാത്ത മാലിന്യങ്ങൾ നീക്കം ചെയ്യുന്നത് ഒരു പ്രധാന പ്രശ്നമാണ്. കൂടാതെ തുറസ്സായ സ്ഥലങ്ങളിലും കായലുകളിലും കുളങ്ങളിലും മാലിന്യം തള്ളുന്നതും വർധിക്കുന്നു. മാലിന്യപ്രശ്‌നം പരിഹരിക്കുക എന്ന ലക്ഷ്യത്തോടെ തയ്യാറാക്കിയ റീസൈക്ലിംഗ് അല്ലെങ്കിൽ റിസോഴ്‌സ് റിക്കവറി സെൻ്ററുകളുടെ വിപുലീകരണം, മൈക്രോ കമ്പോസ്റ്റിംഗ് സെൻ്ററുകൾ സ്ഥാപിക്കൽ, ബയോ സിഎൻജി എന്ന ജൈവ ഇന്ധന ഉൽപ്പാദന കേന്ദ്രങ്ങൾ സ്ഥാപിക്കൽ എന്നിവ വേഗത്തിലാക്കണമെന്ന ആവശ്യവും ഉയരുന്നുണ്ട്.
ഇവ നടപ്പിലാക്കാൻ, വാങ്ങുന്ന സ്ഥലത്ത് 100 ശതമാനം മാലിന്യം വേർതിരിക്കേണ്ടതാണ്. കൃത്യമായ ബോധവൽക്കരണവും കർശനമായ നിർവ്വഹണവും നിരീക്ഷണവും ഈ വിഷയത്തിൽ ആവശ്യമാണ്. ചെന്നൈയിലെ ജനസംഖ്യയും 20 വർഷത്തിനുള്ളിൽ വർദ്ധിക്കും. അവശേഷിക്കുന്ന സ്ഥലങ്ങളും വീടുകളായി മാറുന്ന സാഹചര്യത്തിൽ മാലിന്യപ്രശ്‌നവും രൂക്ഷമാകും.
കഴിഞ്ഞ വർഷം ചെന്നൈയിൽ പെയ്ത മഴ ഖരമാലിന്യ സംസ്കരണത്തിലെ പാളിച്ചകൾ തുറന്നുകാട്ടി. പലയിടത്തും മഴവെള്ളം ഒഴുകിപ്പോകുന്ന ഓടകളിൽ മാലിന്യം കെട്ടിക്കിടന്നു. ഇത്തരമൊരു സാഹചര്യത്തിൽ 2051ൽ ഉൽപ്പാദിപ്പിക്കുന്ന മാലിന്യം ഇപ്പോഴുള്ളതിൻ്റെ മൂന്നിരട്ടിയാകുമെന്നത് ഞെട്ടിക്കുന്ന വസ്തുതയാണ്.