ബെംഗളൂരു: 2023നെ അപേക്ഷിച്ച് 2024ൽ മാരകമായ അപകടങ്ങളുടെ എണ്ണം 1.26 ശതമാനവും, അപകടങ്ങൾ മൂലമുള്ള മരണങ്ങളുടെ എണ്ണം 1.90 ശതമാനവും കുറഞ്ഞതായി ബെംഗളൂരു ട്രാഫിക് പോലീസ് (Bengaluru road accidents). 2023 നെ അപേക്ഷിച്ച്, മാരകമല്ലാത്ത അപകടങ്ങളുടെ എണ്ണം 2024 ൽ 4.57 ശതമാനം കുറഞ്ഞു. മാരകമല്ലാത്ത അപകടങ്ങളുടെ ഈ കുറവ് മൊത്തം അപകടങ്ങളുടെ എണ്ണത്തിൽ 3.97 ശതമാനം കുറവുണ്ടാക്കാൻ കാരണമായെന്നും പോലീസ് പറഞ്ഞു.
2024-ൽ ബാംഗ്ലൂരിൽ 4,784 അപകട കേസുകൾ റിപ്പോർട്ട് ചെയ്യപ്പെട്ടു, അതിൽ 871 എണ്ണം മാരകവും 3,913 മരണം സംഭവിക്കാത്തവയുമാണ്. ഈ അപകടങ്ങളിൽ 893 പേർ മരിക്കുകയും 4,052 പേർക്ക് പരിക്കേൽക്കുകയും ചെയ്തു.
അതേസമയം , ബംഗളൂരു നഗരത്തിൽ പ്രത്യേകിച്ച്, കാൽനടയാത്രക്കാർക്ക് അപകടങ്ങൾ കുറയ്ക്കുന്നതിന് നിരവധി നടപടികൾ സ്വീകരിച്ചിട്ടുണ്ടെന്നും പോലീസ് പറഞ്ഞു, ആ ശ്രമങ്ങൾക്ക് ഫലമുണ്ടായി, 2024-ൽ കാൽനടയാത്രക്കാരുടെ മരണത്തിൽ ഗണ്യമായ കുറവുണ്ടായി, അപകടങ്ങളിൽ 233 പേർക്ക് ജീവൻ നഷ്ടപ്പെട്ടു. 2023 നെ അപേക്ഷിച്ച് 23.17% കുറഞ്ഞതായും പോലീസ് പറഞ്ഞു.
2024ൽ വിവിധ ട്രാഫിക് നിയമലംഘനങ്ങൾക്കായി 82,86,561 കേസുകളും രജിസ്റ്റർ ചെയ്തിട്ടുണ്ട്. 80.90 കോടി രൂപ പിഴ ഈടാക്കുകയും ചെയ്തു.
അതേസമയം , മദ്യപിച്ച് വാഹനമോടിച്ച കേസുകളുടെ എണ്ണം 2024-ൽ വർധിച്ചു, 2023-ൽ 7,053 കേസുകളും 2024-ൽ 23,574 കേസുകളും രജിസ്റ്റർ ചെയ്തു. മെഡിക്കൽ അത്യാഹിതങ്ങൾക്കായി കഴിഞ്ഞ വർഷം ട്രാഫിക് പോലീസ് 54 ഹരിത ഇടനാഴികൾ സൃഷ്ടിച്ചു.
2024ൽ 532 വീലിംഗ് കേസുകൾ രജിസ്റ്റർ ചെയ്യുകയും 520 വാഹനങ്ങൾ പിടിച്ചെടുക്കുകയും 456 പേരെ അറസ്റ്റ് ചെയ്യുകയും ചെയ്തു. വീലിംഗ് കേസുകളിൽ പ്രായപൂർത്തിയാകാത്ത 121 പേർക്കെതിരെയും 79 രക്ഷിതാക്കൾക്കെതിരെയും നടപടി എടുത്തിട്ടുണ്ട്. 146 ഡ്രൈവിംഗ് ലൈസൻസുകൾ സസ്പെൻഷനും 246 ആർസി (രജിസ്ട്രേഷൻ സർട്ടിഫിക്കറ്റ്) റദ്ദാക്കലിനും അയച്ചു.