ന്യൂഡൽഹി: മഹാരാഷ്ട്ര നിയമസഭയിലേക്ക് നടന്ന തിരഞ്ഞെടുപ്പ് ഫലം അപ്രതീക്ഷിതമാണെന്ന് കോൺഗ്രസ് അധ്യക്ഷൻ മല്ലികാർജ്ജുൻ ഖാർഗെയും പ്രതിപക്ഷ നേതാവ് രാഹുൽ ഗാന്ധിയും അഭിപ്രായപ്പെട്ടു.
മഹാരാഷ്ട്രയിൽ ബിജെപി സഖ്യസർക്കാർ നിലനിർത്തിയതിന് സമാനമായി ജാർഖണ്ഡിൽ കോൺഗ്രസ് സഖ്യം വീണ്ടും സർക്കാർ രൂപീകരിക്കുകയാണ്, ഹേമന്ത് സോറൻ അവിടെ വീണ്ടും മുഖ്യമന്ത്രിയാകും- രാഹുൽ പ്രസ്താവനയിൽ പറഞ്ഞു.
'ഇന്ത്യ' സഖ്യത്തിന് നൽകിയ വൻ പിന്തുണയ്ക്ക് ജാർഖണ്ഡിലെ ജനങ്ങൾക്ക് എൻ്റെ ആത്മാർത്ഥമായ നന്ദി അറിയിക്കാൻ ഞാൻ ആഗ്രഹിക്കുന്നു. ഈ വിജയത്തിന് മുഖ്യമന്ത്രി സോറനെയും, കോൺഗ്രസ്, ജെഎംഎം പ്രവർത്തകരെയും ഞാൻ അഭിനന്ദിക്കുന്നു. സഖ്യത്തിൻ്റെ വിജയം സംസ്ഥാനത്തിൻ്റെ വിജയമാണ്. കാടിൻ്റെയും വെള്ളത്തിൻ്റെയും ഭൂമിയുടെയും ഭരണഘടനയുടെയും വിജയം-രാഹുൽ കൂട്ടിച്ചേർത്തു.
അതേസമയം , മഹാരാഷ്ട്ര തിരഞ്ഞെടുപ്പ് ഫലം അപ്രതീക്ഷിതമായിരുന്നുവെന്ന് ഖാർഗെ പ്രസ്താവനയിൽ പറഞ്ഞു. പരാജയത്തിൻ്റെ കാരണങ്ങൾ കണ്ടെത്തണം, ഞങ്ങളുടെ പാർട്ടി പ്രവർത്തകർക്കും ഭരണാധികാരികൾക്കും ഞാൻ നന്ദി പറയുന്നു. ഛത്രപതി ശിവജിയുടെയും അംബേദ്കറുടെയും ആദർശങ്ങളുടെ യഥാർത്ഥ പ്രതിനിധികളാണ് ഞങ്ങൾ. ജനങ്ങളുടെ പ്രശ്‌നങ്ങൾ ഞങ്ങൾ തുടർന്നും ഉന്നയിക്കും. പ്രസ്താവനയിൽ ഖാർഗെ പറഞ്ഞു.