മുംബൈ: മഹാരാഷ്ട്രയിൽ മാതൃകാ പെരുമാറ്റച്ചട്ട ലംഘനവുമായി ബന്ധപ്പെട്ട് കഴിഞ്ഞ ഒരു മാസത്തിനിടെ തിരഞ്ഞെടുപ്പ് കമ്മീഷന് ലഭിച്ചത് 6,382 പരാതികൾ. അതിനിടെ, 536 കോടിയിലധികം രൂപയുടെ പണവും നിരവധി വസ്തുക്കളും പിടിച്ചെടുത്തതായും തിരഞ്ഞെടുപ്പ് കമ്മീഷൻ അറിയിച്ചു.(Maharashtra Elections)
ഒക്ടോബർ 15 ന് മഹാരാഷ്ട്ര നിയമസഭാ തിരഞ്ഞെടുപ്പ് പ്രഖ്യാപിച്ചതോടെ മാതൃകാ പെരുമാറ്റച്ചട്ടം (എംസിസി) നിലവിൽ വന്നു, നവംബർ 14 വരെ 6,382 പരാതികൾ തിരഞ്ഞെടുപ്പ് കമ്മിറ്റിയുടെ cVIGIL ആപ്ലിക്കേഷൻ വഴി ലഭിച്ചതായി സംസ്ഥാന തിരഞ്ഞെടുപ്പ് കമ്മീഷണറുടെ ഓഫീസ് പ്രസ്താവനയിൽ പറഞ്ഞു.
പരാതി രജിസ്റ്റർ ചെയ്തുകഴിഞ്ഞാൽ, ബന്ധപ്പെട്ട സംഘം അന്വേഷിച്ച് ഉചിതമായ നടപടി സ്വീകരിക്കുമെന്ന് തിരഞ്ഞെടുപ്പ് കമ്മീഷൻ അറിയിച്ചു. ഒക്ടോബർ 15നും നവംബർ 14നും ഇടയിൽ സംസ്ഥാന, കേന്ദ്ര ഏജൻസികൾ 536.45 കോടി രൂപയുടെ സ്വത്ത് കണ്ടുകെട്ടി. ഇതിൽ അനധികൃത പണം, മദ്യം, മയക്കുമരുന്ന്, വിലപിടിപ്പുള്ള ലോഹങ്ങൾ എന്നിവ ഉൾപ്പെടുന്നു.
മഹാരാഷ്ട്ര നിയമസഭയിലേക്കുള്ള തിരഞ്ഞെടുപ്പ് നവംബർ 20 ന് ഒറ്റ ഘട്ടമായി നടക്കും, നവംബർ 23 ന് ഫലം പ്രഖ്യാപിക്കും.