തിരുവനന്തപുരം : തിരുവനന്തപുരത്ത് യുവതിയുടെ കുളിമുറി ദൃശ്യങ്ങൾ പകർത്തിയ യുവാവ് അറസ്റ്റിൽ. വീട്ടിലേക്ക് ഓട്ടം വിളിച്ചുവന്ന യൂബർ ഡ്രൈവർ താൻ കുളിക്കുന്ന ദൃശ്യങ്ങൾ ഒളിച്ചുനിന്ന് മൊബൈലിൽ പകർത്തിയെന്ന് യുവതി പരാതിയിൽ പറയുന്നു. കേസിൽ വെടിവച്ചാൻകോവിൽ മുടവൂർപ്പാറ തേരിവിള വീട് വിമലാഭവനിൽ ജിബിൻ (35) പിടിയിലായത്.
ഇക്കഴിഞ്ഞ 16ന് രാത്രി പത്തരയോടെയായിരുന്നു സംഭവം നടന്നത്. വീടിനടുത്തുള്ള റോഡ് സൈഡിൽ ഇറങ്ങിയ ശേഷം ഡ്രൈവർക്ക് പണം കൊടുത്ത് യുവതി വീട്ടിലേക്ക് നടന്നു. ആ സമയം ഇവരെ ഒളിച്ചു പിൻതുടർന്ന ജിബിൻ വീടിന്റെ കോമ്പൌണ്ടിൽ കയറി ഒളിച്ചിരിക്കുകയായിരുന്നു.
കുളിക്കാനായി വീട്ടിനകത്തെ ശുചിമുറിയിൽ കയറിയതോടെ വെന്റിലേഷനിലൂടെ മൊബൈൽ ഉപയോഗിച്ച് ദൃശ്യങ്ങൾ പകർത്തി. വെന്റിലേഷനിൽ മൊബൈൽ ഫോൺ കണ്ട് ഉച്ചത്തിൽ അലറിയതോടെ പ്രതി ഓടി രക്ഷപ്പെടുകയായിരുന്നു. സിസിടിവി ദൃശ്യങ്ങൾ പരിശോധിച്ചാണ് പ്രതിയെ പിടികൂടിയത്.