തിരുവനന്തപുരം: പാലക്കാട് എംഎൽഎ രാഹുൽ മാങ്കൂട്ടത്തിലിനെതിരായ ലൈംഗിക പീഡന പരാതിയിൽ യുവതിയുടെ നിർണായക വെളിപ്പെടുത്തലുകൾ. രണ്ടാം മാസത്തിലാണ് ഗർഭഛിദ്രം നടത്തിയതെന്നും, ഇതിനായി നൽകിയത് അപകടകരമായ മരുന്നുകളായിരുന്നു എന്നും ഡോക്ടർമാർ പോലീസിന് മൊഴി നൽകി. ഗർഭഛിദ്രത്തിന് ശേഷം യുവതി മാനസികമായി തളർന്നതായും പരാതിയിൽ പറയുന്നു.(Woman makes serious revelations about Rahul Mamkootathil MLA)
യുവതിയുടെ പരാതിയുടെ അടിസ്ഥാനത്തിൽ പോലീസ് ആശുപത്രി രേഖകൾ വിശദമായി പരിശോധിച്ചു. മെയ് 30-നാണ് യുവതി മരുന്ന് കഴിച്ചത്. തുടർന്ന് ഗുരുതരമായ രക്തസ്രാവം ഉണ്ടായെന്നും ഇവർ ചികിത്സ തേടിയെന്നുമാണ് രേഖകൾ വ്യക്തമാക്കുന്നത്. ഗർഭഛിദ്രത്തിനായി യുവതിക്ക് രണ്ട് തരം മരുന്നുകളാണ് നൽകിയത്. രക്തസ്രാവത്തെ തുടർന്ന് സർക്കാർ, സ്വകാര്യ ആശുപത്രികളിൽ യുവതി ചികിത്സ തേടി. ഈ വൈദ്യപരിശോധനയുടെ രേഖകൾ പോലീസ് കസ്റ്റഡിയിലെടുത്തിട്ടുണ്ട്.
പരാതിക്ക് പിന്നാലെ ഒളിവിൽ പോയ രാഹുൽ മാങ്കൂട്ടത്തിലും സഹായി ജോബിൻ ജോസഫും ഇപ്പോഴും ഒളിവിൽ തുടരുകയാണ്. ഒളിവിലുള്ള രാഹുലിനെ അറസ്റ്റ് ചെയ്യാനുള്ള നീക്കം പോലീസ് ശക്തമാക്കി. മുൻകൂർ ജാമ്യാപേക്ഷ സമർപ്പിച്ചത് അറസ്റ്റിന് തടസ്സമല്ലെന്നാണ് പോലീസ് വൃത്തങ്ങൾ അറിയിക്കുന്നത്. രാഹുൽ തലസ്ഥാനത്ത് എത്തി വക്കാലത്തിൽ ഒപ്പിട്ടു എന്ന പ്രചാരണവും പോലീസ് തള്ളിയിട്ടുണ്ട്. എല്ലാ ജില്ലകളിലും അന്വേഷണം നടത്താൻ ക്രമസമാധാന ചുമതലയുള്ള എഡിജിപി നിർദ്ദേശം നൽകിയിട്ടുണ്ട്. അതിനിടെ, പരാതിക്കാരിക്ക് പോലീസ് സംരക്ഷണം ഏർപ്പെടുത്തി.
പീഡനം നടന്നതായി പറയുന്ന ഫ്ലാറ്റിലെത്തിച്ച് പോലീസ് പരാതിക്കാരിയുമായി മഹസ്സർ രേഖപ്പെടുത്തി. കൂടുതൽ സാക്ഷികളുടെ മൊഴി ഇന്ന് രേഖപ്പെടുത്തുമെന്നും പോലീസ് അറിയിച്ചു. അതേസമയം, ലൈംഗിക പീഡന കേസിൽ പരാതിക്കാരിയായ യുവതിക്കെതിരെ കൂടുതൽ തെളിവുകൾ കഴിഞ്ഞ ദിവസം രാഹുൽ മാങ്കൂട്ടത്തിൽ തിരുവനന്തപുരം ജില്ലാ കോടതിയിൽ സമർപ്പിച്ചു. സീൽഡ് കവറിലായി ഒൻപത് തെളിവുകളാണ് കോടതിയിൽ നൽകിയത്.
ഗർഭഛിദ്രം യുവതി സ്വന്തം ഇഷ്ടപ്രകാരമാണ് നടത്തിയതെന്നും, യുവതി ജോലി ചെയ്തിരുന്ന ചാനലിന്റെ മേധാവിയാണ് രാഹുലിനെതിരെ പരാതി കൊടുക്കാൻ പ്രേരിപ്പിച്ചതെന്നും സ്ഥാപിക്കുന്നതിനുള്ള തെളിവുകളും രേഖകളുമാണ് നൽകിയതെന്നാണ് പുറത്തുവരുന്ന വിവരം.