കാസർഗോഡ് : കേരളത്തിലെ സ്കൂളുകളിൽ മലയാളം ഒന്നാം ഭാഷയായി നിർബന്ധമാക്കുന്ന നിയമത്തിനെതിരെ ശക്തമായ പ്രതിഷേധവുമായി കർണാടക മുഖ്യമന്ത്രി സിദ്ധരാമയ്യ. കാസർഗോഡ് ജില്ലയിലെ കന്നഡ സംസാരിക്കുന്നവരുടെ ഭാഷാപരമായ അവകാശങ്ങൾ സംരക്ഷിക്കാൻ ഏതറ്റം വരെയും പോകുമെന്ന് അദ്ദേഹം വ്യക്തമാക്കി. മാതൃഭാഷയിൽ പഠിക്കാനുള്ള വിദ്യാർത്ഥികളുടെ അവകാശത്തെ തടയുന്നത് ഭരണഘടനാ വിരുദ്ധമാണെന്നും അദ്ദേഹം ആരോപിച്ചു.(Withdraw the bill or face legal action, Siddaramaiah against Kerala government )
ഭരണഘടനയുടെ ആർട്ടിക്കിൾ 29, 30, 350A, 350B എന്നിവ പ്രകാരം ഭാഷാ ന്യൂനപക്ഷങ്ങളുടെ അവകാശങ്ങൾ നിഷേധിക്കാൻ ഒരു സർക്കാരിനും അധികാരമില്ല. ഇത് കാസർകോട്ടെ കന്നഡിഗരുടെ സ്വത്വത്തിനും അന്തസ്സിനും നേരെയുള്ള കടന്നുകയറ്റമാണ്എന്നാണ് അദ്ദേഹം പറഞ്ഞത്.
മലയാളം മാത്രം ഒന്നാം ഭാഷയാക്കുന്നത് കുട്ടികളുടെ അക്കാദമിക് പുരോഗതിയെയും ആത്മവിശ്വാസത്തെയും ബാധിക്കും. ഭാഷ വെറുമൊരു വിഷയമല്ല, മറിച്ച് ഒരാളുടെ അവസരവും കൂടിയാണ്. ജില്ലയിലെ പല ഭാഗങ്ങളിലും 70 ശതമാനത്തോളം ആളുകൾ കന്നഡ ഉപയോഗിക്കുന്നവരാണ്. അവിടെ മലയാളം അടിച്ചേൽപ്പിക്കുന്നത് ഇന്ത്യയുടെ ബഹുസ്വര സംസ്കാരത്തിന് ചേരുന്നതല്ല എന്നും അദ്ദേഹം ചൂണ്ടിക്കാട്ടി.
കേരളം ഈ ബിൽ പിൻവലിക്കണം. അല്ലാത്തപക്ഷം ഭരണഘടന നൽകുന്ന എല്ലാ അവകാശങ്ങളും ഉപയോഗിച്ച് കർണാടക ഇതിനെ നിയമപരമായി നേരിടും. മലയാളത്തെ പ്രോത്സാഹിപ്പിക്കാൻ കേരളത്തിന് അവകാശമുണ്ട്, എന്നാൽ അത് മറ്റ് ഭാഷകളെ തകർത്തുകൊണ്ടാകരുത്. കന്നഡയുടെ കാര്യത്തിൽ കർണാടകയും ഇതേ നിലപാടാണ് സ്വീകരിക്കുന്നതെന്ന് അദ്ദേഹം പറഞ്ഞു. കാസർകോട്ടെ കന്നഡ മീഡിയം സ്കൂളുകളെയും അവിടുത്തെ വിദ്യാഭ്യാസ ആവാസവ്യവസ്ഥയെയും തകർക്കുന്ന നീക്കത്തിൽ നിന്ന് കേരള സർക്കാർ പിന്തിരിയണമെന്നും അദ്ദേഹം ആവശ്യപ്പെട്ടു.