കോട്ടയം: ആഭിചാരക്രിയയുടെ മറവിൽ യുവതിക്ക് ക്രൂരപീഡനമേറ്റ സംഭവത്തിൽ, പ്രധാന പ്രതിയായ മന്ത്രവാദി ശിവദാസ് ഇത്തരം ക്രിയകൾ പതിവായി ചെയ്തിരുന്നതായി പോലീസിന് മൊഴി നൽകി. കഴിഞ്ഞ മൂന്ന് വർഷമായി പത്തനംതിട്ട ജില്ല കേന്ദ്രീകരിച്ചാണ് ഇയാൾ ഇത്തരം പ്രവർത്തനങ്ങൾ നടത്തിവന്നത്. 30 വർഷം മുമ്പ് ഊരാളികളിൽ നിന്നുമാണ് താൻ ആഭിചാരക്രിയകൾ പഠിച്ചതെന്നും ശിവദാസ് മൊഴി നൽകിയിട്ടുണ്ട്.
പീഡനത്തിൻ്റെ വിശദാംശങ്ങൾ
ഈ മാസം രണ്ടാം തീയതി രാവിലെ 11 മുതൽ രാത്രി 9 വരെ നീണ്ട മണിക്കൂറുകളോളം ശാരീരികവും മാനസികവുമായ പീഡനത്തിനാണ് യുവതി ഇരയായത്.യുവതിയെ മദ്യം നൽകി ബലം പ്രയോഗിച്ച് കട്ടിലിൽ കിടത്തി. ബീഡി വലിപ്പിക്കുകയും, ഈ ബീഡികൊണ്ട് തലയിൽ പൊള്ളലേൽപ്പിക്കുകയും, ഭസ്മം തീറ്റിക്കുകയും ചെയ്തതായി യുവതി മൊഴി നൽകി.രക്ഷപ്പെടാൻ ശ്രമിച്ചപ്പോൾ പട്ടുകൾ ഉപയോഗിച്ച് കട്ടിലിൽ കെട്ടിയിടാൻ ശ്രമിച്ചു. വീണ്ടും ഓടാൻ ശ്രമിച്ചപ്പോൾ ഭർത്താവ് അഖിൽദാസ് മർദ്ദിച്ചെന്നും ആരോപണമുണ്ട്. യുവതിയും ഭർത്താവ് അഖിൽദാസും തമ്മിലുള്ള പ്രണയ വിവാഹം നടന്നിട്ട് ഒന്നരയാഴ്ച മാത്രമേ ആയിരുന്നുള്ളൂ. ഇതിനിടയിലാണ് ആഭിചാരക്രിയകൾക്ക് വേണ്ടി യുവതിയെ നിർബന്ധിച്ചത്.
പ്രതികളും അറസ്റ്റും
യുവതിക്ക് ക്രൂരമർദനമേറ്റതിനെ തുടർന്ന് മാനസികനില തകരാറിലായതോടെ പിതാവ് മണർകാട് പോലീസ് സ്റ്റേഷനിൽ പരാതി നൽകുകയായിരുന്നു.ഭർത്താവ് അഖിൽദാസ്, ഭർതൃപിതാവ് ദാസ്, മന്ത്രവാദി ശിവദാസ് എന്നിവരെയാണ് കഴിഞ്ഞ ദിവസം മണർകാട് പോലീസ് അറസ്റ്റ് ചെയ്തത്.സംഭവത്തിനുശേഷം ഫോൺ സ്വിച്ച് ഓഫ് ചെയ്തു മാറിനിന്ന ഒന്നാം പ്രതി ശിവദാസിനെ തിരുവല്ല മുത്തൂർ ഭാഗത്തുനിന്നാണ് അറസ്റ്റ് ചെയ്തത്. കൂട്ടുപ്രതികളായ അഖിൽദാസിൻ്റെ മാതാവ് സൗമിനിയും മറ്റുള്ളവരും ഒളിവിലാണ്.
നിർണായക വീഡിയോ തെളിവ്
യുവതിയെ ആഭിചാര ക്രിയകൾക്ക് വഴങ്ങാൻ ഭർതൃമാതാവ് സൗമിനി നിർബന്ധിച്ചിരുന്നു. ആഭിചാര ക്രിയകൾക്ക് വഴങ്ങിയില്ലെങ്കിൽ ദൈവകോപമുണ്ടാകുമെന്ന് വിശ്വസിപ്പിച്ചാണ് യുവതിയെ ഇവിടെ എത്തിച്ചത്. സമീപകാലത്ത് മരിച്ച രണ്ട് ബന്ധുക്കളുടെ ആത്മാക്കൾ യുവതിയുടെ ദേഹത്ത് കയറിയെന്ന് വിശ്വസിച്ചാണ് സൗമിനി ശിവദാസിനെ നിരന്തരം സന്ദർശിച്ചിരുന്നത്.ആഭിചാരക്രിയകൾ അഖിൽദാസിൻ്റെ സഹോദരി വീഡിയോ ചിത്രീകരിച്ചിരുന്നു. ഈ വീഡിയോ പോലീസിന് ലഭിച്ചിട്ടുണ്ട്. വീഡിയോയിലെ ദൃശ്യങ്ങളിൽ നിന്ന് യുവതിയോടുള്ള ക്രൂരത വ്യക്തമാണ്.