തൃശൂർ: ഗുരുവായൂർ നിയമസഭാ സീറ്റ് കോൺഗ്രസിന് വിട്ടുനൽകില്ലെന്ന് മുസ്ലിം ലീഗ് തൃശൂർ ജില്ലാ നേതൃത്വം. സീറ്റ് കൈമാറ്റം സംബന്ധിച്ച് യാതൊരു ചർച്ചയും നടന്നിട്ടില്ലെന്നും അത്തരമൊരു ആവശ്യം ഉന്നയിക്കേണ്ടതില്ലെന്നും മുസ്ലിം ലീഗ് ജില്ലാ പ്രസിഡന്റ് സി.എ. റഷീദ് പറഞ്ഞു.(Will not give Guruvayur, Muslim League responds)
ഗുരുവായൂർ മണ്ഡലത്തിൽ കാലങ്ങളായി യുഡിഎഫ് പരാജയപ്പെടുന്നത് ചൂണ്ടിക്കാട്ടിയാണ് സീറ്റ് ഏറ്റെടുക്കണമെന്ന ആവശ്യം തൃശൂർ ഡിസിസി പ്രസിഡന്റ് ജോസഫ് ടാജറ്റ് മുന്നോട്ടുവെച്ചത്. മണ്ഡലത്തിൽ കോൺഗ്രസ് സ്ഥാനാർത്ഥി കൈപ്പത്തി ചിഹ്നത്തിൽ മത്സരിക്കണമെന്നാണ് പ്രാദേശിക പ്രവർത്തകരുടെ ആഗ്രഹമെന്ന് ടാജറ്റ് പറഞ്ഞിരുന്നു. ഈ ആവശ്യം ഉന്നയിച്ച് ജില്ലാ നേതൃത്വം കെപിസിസിക്ക് റിപ്പോർട്ട് നൽകിയിട്ടുണ്ട്.
കോൺഗ്രസിന്റെ ഈ നീക്കത്തിനെതിരെ കടുത്ത നിലപാടാണ് ലീഗ് സ്വീകരിച്ചിരിക്കുന്നത്. ഗുരുവായൂരിലെ മുൻകാല പരാജയങ്ങൾക്ക് കാരണം സീറ്റ് ലീഗിന്റേതായത് കൊണ്ടല്ല, മറിച്ച് മറ്റു പല രാഷ്ട്രീയ സാഹചര്യങ്ങളുമാണെന്ന് സി.എ. റഷീദ് ചൂണ്ടിക്കാട്ടി. അടുത്തിടെ നടന്ന തദ്ദേശ തിരഞ്ഞെടുപ്പിൽ ഗുരുവായൂർ മേഖലയിൽ യുഡിഎഫ് വലിയ മുന്നേറ്റം നടത്തിയിട്ടുണ്ട്. ഈ ആത്മവിശ്വാസത്തിൽ അടുത്ത നിയമസഭാ തിരഞ്ഞെടുപ്പിൽ ലീഗ് സ്ഥാനാർത്ഥി തന്നെ മണ്ഡലം തിരിച്ചുപിടിക്കുമെന്നും അദ്ദേഹം അവകാശപ്പെട്ടു.