വയനാട്: വരാനിരിക്കുന്ന നിയമസഭാ തെരഞ്ഞെടുപ്പിൽ 100-ലധികം സീറ്റുകൾ നേടി യുഡിഎഫ് ഭരണത്തിൽ തിരിച്ചെത്തുമെന്ന് പ്രതിപക്ഷ നേതാവ് വി.ഡി. സതീശൻ. വയനാട്ടിൽ നടന്ന കോൺഗ്രസ് നേതൃക്യാമ്പ് 'ലക്ഷ്യം-2026'-ന്റെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം. ഇത് വെറും യുഡിഎഫ് അല്ലെന്നും 'ടീം യുഡിഎഫ്' ആണെന്നും കേരളം കണ്ട ഏറ്റവും വലിയ രാഷ്ട്രീയ പ്ലാറ്റ്ഫോമായി ഇത് മാറുമെന്നും അദ്ദേഹം അവകാശപ്പെട്ടു.(Will come to power with more than 100 seats, VD Satheesan announces Mission 2026)
തെരഞ്ഞെടുപ്പ് തന്ത്രങ്ങൾ ആവിഷ്കരിച്ചുകൊണ്ട് സതീശൻ അവതരിപ്പിച്ച 'മിഷൻ 2026' രൂപരേഖയിൽ വിസ്മയകരമായ മാറ്റങ്ങളെക്കുറിച്ച് പറയുന്നു. തെരഞ്ഞെടുപ്പിന് മുൻപ് തന്നെ ഇടതുപക്ഷ സഹയാത്രികരായ പ്രമുഖ കക്ഷികൾ യുഡിഎഫ് പ്ലാറ്റ്ഫോമിലെത്തും. ക്രൈസ്തവ സഭകളിലേക്ക് കടന്നുകയറാനുള്ള ബിജെപി ശ്രമങ്ങളെ തടയാൻ യുഡിഎഫിന് കഴിഞ്ഞു. അകന്നുപോയ ക്രൈസ്തവ വിഭാഗങ്ങൾ തിരിച്ചുവന്നതായും മുസ്ലിം സമുദായം മുന്നണിയോട് കൂടുതൽ അടുത്തതായും മിഷൻ വിലയിരുത്തുന്നു.
ശബരിമലയിലെ സ്വർണ്ണക്കൊള്ള ഹൈന്ദവ വോട്ടുകളെ യുഡിഎഫിന് അനുകൂലമാക്കും. ഇതിൽ കൂടുതൽ സിപിഎം നേതാക്കളുടെ പങ്ക് വരുംദിവസങ്ങളിൽ പുറത്തുവരും. അധികാരത്തിലെത്തിയാൽ നികുതി കൊള്ള നടത്തുന്നവരെ നിയമത്തിന് മുന്നിൽ കൊണ്ടുവരും. നികുതി വരുമാനം വർദ്ധിപ്പിക്കാനുള്ള നടപടികൾ സ്വീകരിക്കുമെന്നും ഇതിൽ പറയുന്നു.
മുഖ്യമന്ത്രി സ്ഥാനത്തെച്ചൊല്ലി പാർട്ടിയിൽ തർക്കമുണ്ടെന്ന പ്രചാരണം സിപിഎം തന്ത്രമാണെന്ന് വി.ഡി. സതീശൻ പറഞ്ഞു. "മുഖ്യമന്ത്രി ആരാകുമെന്ന് കോൺഗ്രസ് ദേശീയ നേതൃത്വം തീരുമാനിക്കും. നേതാക്കളുടെ വലിയ നിര തന്നെ നമുക്കുണ്ട്. ദേശീയ നേതൃത്വത്തിന്റെ തീരുമാനത്തിൽ ആരും തർക്കിക്കില്ല," അദ്ദേഹം വ്യക്തമാക്കി.
എൽഡിഎഫ് സർക്കാരിനെ താഴെയിറക്കാൻ യുഡിഎഫിനേക്കാൾ കൂടുതൽ ആഗ്രഹിക്കുന്നത് കേരളത്തിലെ ജനങ്ങളാണെന്നും അദ്ദേഹം കൂട്ടിച്ചേർത്തു. പ്രസംഗത്തിന് പിന്നാലെ കെപിസിസി നേതൃത്വം വി.ഡി. സതീശനെ അഭിനന്ദിച്ചു.