കോഴിക്കോട്: കേന്ദ്ര വഖഫ് പോർട്ടലായ 'ഉമീദിൽ' വഖഫ് സ്വത്തുക്കളുടെ വിശദാംശങ്ങൾ രജിസ്റ്റർ ചെയ്യേണ്ട സമയപരിധി ഡിസംബർ 5-ന് അവസാനിക്കാനിരിക്കെ, പോർട്ടലിലെ സാങ്കേതിക അപാകതകൾ പരിഹരിച്ച് അപ്‌ലോഡിങ് പ്രക്രിയയ്ക്ക് കൂടുതൽ സാവകാശം അനുവദിക്കണമെന്ന് കാന്തപുരം എ.പി. അബൂബക്കർ മുസ്‌ലിയാർ ആവശ്യപ്പെട്ടു. ഇത് സംബന്ധിച്ച് പ്രധാനമന്ത്രി നരേന്ദ്ര മോദിക്കും വഖഫ് ചുമതലയുള്ള ന്യൂനപക്ഷ വകുപ്പ് മന്ത്രി കിരൺ റിജ്ജുവിനും അദ്ദേഹം കത്തയച്ചു.(Waqf portal uploading: Kanthapuram writes to PM seeking extension of deadline)
നിലവിൽ രാജ്യവ്യാപകമായി അപ്‌ലോഡിങ് പ്രക്രിയ നടക്കുന്നുണ്ടെങ്കിലും വെബ്സൈറ്റിന്റെ സാങ്കേതിക പോരായ്മകൾ കാരണം സമയദൈർഘ്യവും സബ്മിഷൻ സങ്കീർണതകളും നടപടിക്രമങ്ങളെ സാരമായി ബാധിക്കുന്നുണ്ട്. പുതുതായി അവതരിപ്പിച്ച പോർട്ടൽ എന്ന നിലയിൽ നിരവധി സാങ്കേതിക പോരായ്മകൾ ഇതിനുണ്ട്. കൂടാതെ, സവിശേഷ വെബ്സൈറ്റ് സംബന്ധിച്ച ഡിജിറ്റൽ സാക്ഷരതയുടെ കുറവും ഉപയോക്താക്കളെ വലയ്ക്കുന്നുണ്ട്.
ബോധവത്കരണ പ്രവർത്തനങ്ങളും പോർട്ടലിന്റെ അപ്‌ഡേഷനും ഇനിയും നടക്കേണ്ടതുണ്ടെന്നും, അതിനാൽ അപ്‌ലോഡ് ചെയ്യാനുള്ള കാലാവധി ഒരു വർഷം വരെയെങ്കിലും നീട്ടിത്തരണമെന്നും കത്തിൽ ആവശ്യപ്പെട്ടു. കുറഞ്ഞ സമയപരിധി ആയിരക്കണക്കിന് 'മുതവല്ലി'കളെയും വഖഫ് സ്വത്തുക്കളെയും പിഴ നൽകാനുള്ള സാധ്യതയിലേക്ക് നയിക്കുന്നുവെന്ന് കാന്തപുരം കത്തിൽ ചൂണ്ടിക്കാട്ടി. സർക്കാർ പ്ലാറ്റ്‌ഫോമിലെ പ്രവർത്തനപരമായ സാങ്കേതിക തകരാറുകൾക്ക് ഉപയോക്താക്കളെ ശിക്ഷിക്കരുതെന്നും അദ്ദേഹം പറഞ്ഞു.
വഖഫ് ഭേദഗതിയിലും അപ്‌ലോഡിങ് സാവകാശം ആവശ്യപ്പെട്ടും വിവിധ കക്ഷികൾ ഉന്നയിച്ച ഹർജികൾ നിലവിൽ സുപ്രീം കോടതിയുടെ പരിഗണനയിലിരിക്കുകയാണ്. ഈ സാഹചര്യത്തിൽ രജിസ്‌ട്രേഷൻ നടപടികൾ അവസാനിപ്പിക്കുന്നത് ആശങ്കാജനകമാണെന്ന് വിവിധ മുസ്ലിം സംഘടനകളും മഹല്ല് കൂട്ടായ്മകളും അഭിപ്രായപ്പെട്ടു.