തിരുവനന്തപുരം: 2026-ലെ കേരള നിയമസഭാ തിരഞ്ഞെടുപ്പിൽ കന്നിവോട്ടർമാരെ സ്വീകരിക്കാൻ പോളിംഗ് ബൂത്തുകളിൽ ഇത്തവണ മധുരമുണ്ടാകും. കന്നിവോട്ടർമാരുടെ പങ്കാളിത്തം വർദ്ധിപ്പിക്കുന്നതിനായി മുഖ്യ തിരഞ്ഞെടുപ്പ് ഓഫീസർ ‘വോട്ട് സ്വീറ്റൻഡ് കേരള’ എന്ന പേരിൽ പ്രത്യേക കാമ്പയിൻ പ്രഖ്യാപിച്ചു (Vote Sweetened Kerala Campaign). തിരഞ്ഞെടുക്കപ്പെട്ട പോളിംഗ് ബൂത്തുകളിൽ വോട്ട് ചെയ്യാനെത്തുന്ന ആദ്യത്തെ കന്നിവോട്ടർമാർക്ക് ‘ഫുൾവ-ഹൽവ’ പാക്കറ്റുകൾ നൽകി അഭിനന്ദിക്കാനാണ് തീരുമാനം.
ജനാധിപത്യ പ്രക്രിയയിലേക്ക് യുവാക്കളെ ആവേശത്തോടെ സ്വാഗതം ചെയ്യുക എന്നതാണ് ഈ പദ്ധതിയുടെ ലക്ഷ്യം. ഓരോ ജില്ലയിലെയും ജില്ലാ തിരഞ്ഞെടുപ്പ് ഓഫീസർമാർ (DEO) നിശ്ചയിക്കുന്ന പ്രത്യേക ബൂത്തുകളിലായിരിക്കും ഹൽവ വിതരണം നടക്കുക. ഓരോ ഡി.ഇ.ഒ ഓഫീസിലും ഇതിനായി 200 ഹൽവ പാക്കറ്റുകൾ വീതം ലഭ്യമാക്കും. ബൂത്ത് ലെവൽ ഓഫീസർമാരോ വോളന്റിയർമാരോ വോട്ടർമാരുടെ തിരിച്ചറിയൽ രേഖ പരിശോധിച്ച് കന്നിവോട്ടറാണെന്ന് ഉറപ്പുവരുത്തിയ ശേഷമായിരിക്കും സമ്മാനം നൽകുക.
വോട്ടിംഗ് പ്രക്രിയയെ ബാധിക്കാത്ത രീതിയിൽ അധിക വോളന്റിയർമാരെ ഉപയോഗിച്ചായിരിക്കും വിതരണം ക്രമീകരിക്കുക. ഈ പദ്ധതിയുടെ ഭാഗമായി പൊതുജനങ്ങൾക്കിടയിൽ അവബോധം വളർത്തുന്നതിനായി ഹൽവ വിതരണത്തിന്റെ ചിത്രങ്ങളും വീഡിയോകളും പ്രചരിപ്പിക്കാനും ജില്ലാ തിരഞ്ഞെടുപ്പ് ഓഫീസർമാർക്ക് നിർദ്ദേശം നൽകിയിട്ടുണ്ട്.
Summary: To encourage youth participation in the 2026 Kerala Assembly Elections, the Chief Electoral Officer has launched the ‘Vote Sweetened Kerala’ campaign. First-time voters at selected polling booths will be greeted with ‘Fulwa-Halwa’ packets as a token of appreciation. Each District Election Office (DEO) will distribute 200 branded halwa packets through volunteers after verifying the voters’ first-time status. The initiative aims to make the voting experience memorable for the youth without disrupting the polling process.
