വോൾവോയുടെ ഏറ്റവും പുതിയ ഇലക്ട്രിക് കാറായ EX30 ഇന്ത്യയിൽ അവതരിപ്പിച്ചു. ഈ വാഹനം 39,99,000 രൂപയ്ക്ക് സ്വന്തമാക്കാം, എന്നാൽ ഈ പ്രത്യേക വില 2025 ഒക്ടോബർ 19-ന് മുമ്പ് ബുക്ക് ചെയ്യുന്നവർക്ക് മാത്രമാണ് ലഭിക്കുക. എക്സ്-ഷോറൂം വില 41,00,000 രൂപയാണ്. 2025 നവംബർ ആദ്യവാരം മുതൽ ഡെലിവറി ആരംഭിക്കും.
ഈ മോഡൽ, വോൾവോയുടെ മൂന്നാമത്തെ ഇലക്ട്രിക് വാഹനമാണ്. 69 kWh ലിഥിയം-അയൺ ബാറ്ററി ഉപയോഗിക്കുന്ന ഇതിന് ഒറ്റ ചാർജിൽ 480 കി.മീ വരെ റേഞ്ച് ലഭിക്കും. 272 hp പവറും 343 Nm ടോർക്കുമുള്ള ഈ കാർ 5.3 സെക്കൻഡിനുള്ളിൽ 0-100 കി.മീ വേഗത കൈവരിക്കും.
സുരക്ഷയുടെ കാര്യത്തിൽ, യൂറോ NCAP ഫൈവ് സ്റ്റാർ റേറ്റിംഗ് ലഭിച്ച EX30-ൽ നൂതനമായ 'സേഫ് സ്പേസ് ടെക്നോളജി' ഉൾപ്പെടുത്തിയിട്ടുണ്ട്. ഇന്റർസെക്ഷൻ ഓട്ടോ-ബ്രേക്ക്, ഡോർ ഓപ്പൺ അലേർട്ട്, 5 ക്യാമറകൾ, 5 റഡാറുകൾ, 12 അൾട്രാസോണിക് സെൻസറുകൾ എന്നിവ ഇതിൽപ്പെടുന്നു. പുനരുപയോഗിച്ച വസ്തുക്കൾ ഉപയോഗിച്ച് നിർമ്മിച്ച ഇന്റീരിയറിൽ 12.3 ഇഞ്ച് ടച്ച് സ്ക്രീൻ ഡിസ്പ്ലേ, ഗൂഗിൾ ബിൽറ്റ്-ഇൻ, വയർലെസ് ഫോൺ ചാർജിങ്, ഹാർമൻ കാർഡൺ പ്രീമിയം സൗണ്ട് സിസ്റ്റം എന്നിവയുണ്ട്.
8 വർഷത്തെ ബാറ്ററി വാറന്റിയും 3 വർഷത്തെ സമഗ്ര കാർ വാറന്റിയും ഉൾപ്പെടുന്ന 'ഹസിൽ ഫ്രീ പാക്കേജ്' വോൾവോ വാഗ്ദാനം ചെയ്യുന്നു. കൂടാതെ, റെഡ് ഡോട്ട് അവാർഡ് 2024, വേൾഡ് അർബൻ കാർ ഓഫ് ദി ഇയർ 2024 തുടങ്ങിയ അന്താരാഷ്ട്ര പുരസ്കാരങ്ങളും ഈ മോഡലിന് ലഭിച്ചിട്ടുണ്ട്.