പാലക്കാട്: രാഹുൽ മാങ്കൂട്ടത്തിലിനെതിരായ ലൈംഗിക പീഡന പരാതി അന്വേഷിക്കുന്ന പോലീസ് സംഘം പാലക്കാടെത്തി. തിരുവനന്തപുരത്തുനിന്നുള്ള പോലീസ് സംഘമാണ് രാഹുൽ താമസിച്ചിരുന്ന കുന്നത്തൂർമേടിലെ ഫ്ലാറ്റിൽ വീണ്ടും പരിശോധന നടത്തി തെളിവെടുത്തത്. എം.എൽ.എയുടെ ഔദ്യോഗിക വാഹനം പാലക്കാട്ടെ ഫ്ലാറ്റിൽത്തന്നെ ഉണ്ടെന്ന് പോലീസ് സ്ഥിരീകരിച്ചു. ഫ്ലാറ്റിൽ കൂടുതൽ പരിശോധനകൾ നടത്തുമെന്നും അന്വേഷണ സംഘം അറിയിച്ചു.(Voice test of woman who filed complaint against MLA Rahul Mamkootathil today)
രാഹുൽ കോയമ്പത്തൂരിൽ ഒളിച്ചുകഴിയുന്നതായുള്ള സംശയത്തെത്തുടർന്ന് പോലീസിന്റെ പ്രത്യേക സംഘം തമിഴ്‌നാട് കേന്ദ്രീകരിച്ചും അന്വേഷണം നടത്തുന്നുണ്ട്. ഇതുമായി ബന്ധപ്പെട്ട ഇന്റലിജൻസ് വിവരങ്ങളെല്ലാം അന്വേഷണ സംഘം ശേഖരിച്ചിട്ടുണ്ട്.
കേസുമായി ബന്ധപ്പെട്ട് പുറത്തുവന്ന സംഭാഷണം പരാതിക്കാരിയുടെതാണോ എന്ന് ഉറപ്പുവരുത്തുന്നതിനായി ഇന്ന് യുവതിയുടെ ശബ്ദ സാമ്പിൾ പരിശോധന നടത്തും. തിരുവല്ലം ചിത്രാഞ്ജലിയിലാണ് ഇതിനായുള്ള ക്രമീകരണങ്ങൾ ഒരുക്കിയിരിക്കുന്നത്. അതിനിടെ, പരാതിക്കാരിയായ യുവതിക്ക് പോലീസ് സംരക്ഷണം ഏർപ്പെടുത്തി.
യുവതിയുടെ പരാതിക്ക് പിന്നാലെ ഒളിവില്‍ പോയ രാഹുൽ മാങ്കൂട്ടത്തിലും സഹായിയും ഇപ്പോഴും ഒളിവിലാണ്. ഒളിവിലുള്ള എം.എൽ.എയെ അറസ്റ്റ് ചെയ്യാൻ പോലീസ് നീക്കം ആരംഭിച്ചു. മുൻകൂർ ജാമ്യാപേക്ഷ സമർപ്പിച്ചത് അറസ്റ്റിന് തടസ്സമല്ലെന്നാണ് പോലീസ് വൃത്തങ്ങൾ വ്യക്തമാക്കുന്നത്. രാഹുൽ മാങ്കൂട്ടത്തിൽ തലസ്ഥാനത്തെത്തി വക്കാലത്തിൽ ഒപ്പിട്ടുവെന്ന റിപ്പോർട്ടുകൾ പോലീസ് തള്ളി. എല്ലാ ജില്ലകളിലും അന്വേഷണം വ്യാപിപ്പിക്കാൻ ക്രമസമാധാന ചുമതലയുള്ള എ.ഡി.ജി.പി. നിർദ്ദേശം നൽകിയിട്ടുണ്ട്.
രാഹുൽ മാങ്കൂട്ടത്തിലിനെതിരായ പരാതിയിൽ യുവതി ഉന്നയിച്ച ഗുരുതര ആരോപണങ്ങൾ നേരത്തെ പുറത്തുവന്നിരുന്നു. രണ്ടാം മാസത്തിലാണ് ഗർഭഛിദ്രം നടത്തിയതെന്ന് യുവതി പോലീസിനോട് പറഞ്ഞു. ഗർഭഛിദ്രത്തിനായി യുവതിക്ക് നൽകിയത് അപകടകരമായ മരുന്നുകളായിരുന്നു എന്ന് ഡോക്ടർമാർ പോലീസിന് മൊഴി നൽകിയിട്ടുണ്ട്. ഗർഭഛിദ്രത്തിന് ശേഷം യുവതി മാനസികമായി തളർന്നു.
മെയ് 30-നാണ് യുവതി മരുന്ന് കഴിച്ചത്. തുടർന്ന് ഗുരുതരമായ രക്തസ്രാവം ഉണ്ടായെന്നും ഇവർ സർക്കാർ, സ്വകാര്യ ആശുപത്രികളിൽ ചികിത്സ തേടിയെന്നും രേഖകൾ വ്യക്തമാക്കുന്നു. വൈദ്യപരിശോധനയുടെ രേഖകൾ ഉൾപ്പെടെ പോലീസ് കസ്റ്റഡിയിലെടുത്തിട്ടുണ്ട്.