തിരുവനന്തപുരം: കേരളത്തിന്റെ അഭിമാന പദ്ധതിയായ വിഴിഞ്ഞം അന്താരാഷ്ട്ര തുറമുഖം ലോകോത്തര ട്രാൻസ്ഷിപ്പ്മെന്റ് ഹബ്ബായി മാറാനൊരുങ്ങുന്നു (Vizhinjam Port Phase 2 Inauguration). തുറമുഖത്തിന്റെ രണ്ടാം ഘട്ട നിർമ്മാണോദ്ഘാടനം ജനുവരി 24-ന് വൈകിട്ട് നാലിന് മുഖ്യമന്ത്രി പിണറായി വിജയൻ നിർവ്വഹിക്കുമെന്ന് മന്ത്രി വി.എൻ. വാസവൻ അറിയിച്ചു. 2045-ൽ പൂർത്തിയാകേണ്ടിയിരുന്ന വികസന പ്രവർത്തനങ്ങൾ സർക്കാരിന്റെ കൃത്യമായ ഇടപെടലുകളിലൂടെ 17 വർഷം മുൻപേ, അതായത് 2028-ഓടെ പൂർത്തിയാക്കാനാണ് ലക്ഷ്യമിടുന്നത്.
രണ്ടാം ഘട്ട വികസനത്തിനായി 9,700 കോടി രൂപയാണ് നിക്ഷേപിക്കുന്നത്. ഈ ഘട്ടത്തിൽ തുറമുഖത്തിന്റെ ശേഷി 10 ലക്ഷം ടി.ഇ.യുവിൽ നിന്ന് 50 ലക്ഷം ടി.ഇ.യുവായി വർദ്ധിക്കും. നിലവിലുള്ള 800 മീറ്റർ ബെർത്ത് 2000 മീറ്ററായും, പുലിമുട്ട് (ബ്രേക്ക് വാട്ടർ) മൂന്ന് കിലോമീറ്ററിൽ നിന്ന് നാല് കിലോമീറ്ററായും വികസിപ്പിക്കും. ഇതോടെ ഒരേസമയം നാല് മദർഷിപ്പുകൾക്ക് ചരക്ക് കൈമാറ്റം നടത്താൻ കഴിയുന്ന ഇന്ത്യയിലെ ഏറ്റവും വലിയ സ്ട്രെയ്റ്റ് ബെർത്ത് തുറമുഖമായി വിഴിഞ്ഞം മാറും.
രണ്ടാം ഘട്ടത്തിലെ പ്രധാന ആകർഷണങ്ങൾ:
ലിക്വിഡ് ടെർമിനലും ടാങ്ക് ഫാമും: രാജ്യാന്തര കപ്പൽ പാതയിലൂടെ കടന്നുപോകുന്ന വമ്പൻ കപ്പലുകൾക്ക് ഇന്ധനം നിറയ്ക്കാനുള്ള (Bunkering) സൗകര്യം ഇവിടെയൊരുങ്ങും. ഇത് സംസ്ഥാനത്തിന്റെ നികുതി വരുമാനത്തിൽ വലിയ വർദ്ധനവുണ്ടാക്കും.
റെയിൽവേ യാർഡ്: കണ്ടെയ്നർ നീക്കം വേഗത്തിലാക്കാൻ അത്യാധുനിക റെയിൽവേ യാർഡ് സജ്ജമാക്കും.
ക്രൂസ് ടെർമിനൽ: വൻകിട വിനോദസഞ്ചാര കപ്പലുകൾക്ക് അടുക്കാൻ സൗകര്യമൊരുങ്ങുന്നതോടെ കേരളത്തിലെ ടൂറിസം മേഖലയിൽ വലിയ കുതിച്ചുചാട്ടമുണ്ടാകും.
ശേഷി വർദ്ധന: യാർഡിൽ ഒരേസമയം സൂക്ഷിക്കാവുന്ന കണ്ടെയ്നറുകളുടെ എണ്ണം 35,000-ൽ നിന്ന് ഒരു ലക്ഷമായി ഉയരും. ആകെ ക്രെയിനുകളുടെ എണ്ണം 100 ആയി വർദ്ധിപ്പിക്കും.
കടൽ നികത്തിയെടുക്കുന്ന 55 ഹെക്ടർ ഭൂമിയിലാണ് പുതിയ സൗകര്യങ്ങൾ ഒരുങ്ങുന്നത് എന്നതിനാൽ അധികമായി ഭൂമി ഏറ്റെടുക്കേണ്ടി വരില്ല. വാണിജ്യാടിസ്ഥാനത്തിലുള്ള പ്രവർത്തനം തുടങ്ങി വെറും പത്ത് മാസത്തിനുള്ളിൽ 500-ലധികം കപ്പലുകൾ വിഴിഞ്ഞത്ത് എത്തിയതും 106 കോടി രൂപ നികുതിയിനത്തിൽ സർക്കാരിന് ലഭിച്ചതും പദ്ധതിയുടെ വൻ വിജയമാണ് സൂചിപ്പിക്കുന്നത്. പുതിയ ഷിപ്പിംഗ്, ലോജിസ്റ്റിക് കമ്പനികൾ എത്തുന്നതോടെ തൊഴിലവസരങ്ങളിലും വൻ വർദ്ധനവുണ്ടാകുമെന്ന് മന്ത്രി കൂട്ടിച്ചേർത്തു.
Chief Minister Pinarayi Vijayan will inaugurate the second phase of Vizhinjam International Port construction on January 24, moving the 2045 completion target to 2028. The ₹9,700 crore expansion aims to increase container capacity to 5 million TEU and extend the berth to 2,000 meters, enabling four motherships to dock simultaneously. Key additions include a liquid terminal, tank farm, railway yard, and cruise terminal, positioning Vizhinjam as South Asia's premier maritime gateway and significantly boosting Kerala's revenue and tourism.