വിതുര: തിരുവനന്തപുരം വിതുരയിലെ സ്വകാര്യ ലോഡ്ജിൽ ഒളിവിൽ താമസിക്കുകയായിരുന്ന യുവതിയെയും യുവാവിനെയും മരിച്ച നിലയിൽ കണ്ടെത്തി. മാരായമുട്ടം സ്വദേശി സുബിൻ (28), ആര്യനാട് സ്വദേശിനി മഞ്ജു (31) എന്നിവരാണ് മരിച്ചത്. ബുധനാഴ്ച ഉച്ചയോടെയാണ് ലോഡ്ജ് അധികൃതർ ഇരുവരെയും മരിച്ച നിലയിൽ കണ്ടെത്തിയത്.
വിവാഹിതരായ സുബിനും മഞ്ജുവും തമ്മിൽ ദീർഘനാളായി പ്രണയത്തിലായിരുന്നുവെന്ന് പോലീസ് പറയുന്നു. ഇരുവരെയും കഴിഞ്ഞ ദിവസങ്ങളിൽ കാണാതായിരുന്നു. സുബിനെ കാണാതായതിനെത്തുടർന്ന് മാരായമുട്ടം പോലീസിലും മഞ്ജുവിനെ കാണാതായതിന് ആര്യങ്കോട് പോലീസിലും കുടുംബങ്ങൾ പരാതി നൽകിയിരുന്നു.
ഇരുവരുടെയും അവിഹിത ബന്ധം വീട്ടുകാർ അറിഞ്ഞതോടെ കുടുംബങ്ങളിൽ വലിയ പ്രശ്നങ്ങൾ നിലനിന്നിരുന്നു. ഇതേത്തുടർന്നാണ് ഇരുവരും നാടുവിട്ട് വിതുരയിലെ ലോഡ്ജിൽ മുറിയെടുത്തത്.
മുറി തുറക്കാത്തതിനെത്തുടർന്ന് ലോഡ്ജ് ജീവനക്കാർ പോലീസിനെ വിവരം അറിയിക്കുകയായിരുന്നു. പോലീസ് എത്തി വാതിൽ തകർത്ത് അകത്തു കടന്നപ്പോഴാണ് മൃതദേഹങ്ങൾ കണ്ടെത്തിയത്.
ഇൻക്വസ്റ്റ് നടപടികൾക്ക് ശേഷം മൃതദേഹങ്ങൾ പോസ്റ്റ്മോർട്ടത്തിനായി മെഡിക്കൽ കോളേജ് ആശുപത്രിയിലേക്ക് മാറ്റി.
ലോഡ്ജിൽ നിന്ന് ആത്മഹത്യാ കുറിപ്പ് ലഭിച്ചിട്ടുണ്ടോ എന്ന് പോലീസ് പരിശോധിച്ചു വരികയാണ്.