കൊച്ചി: ലക്ഷദ്വീപിൽ എല്ലാ ബുധനാഴ്ചകളിലും വാഹനങ്ങൾ ഒഴിവാക്കണമെന്ന വിവാദ ഉത്തരവ് തൽക്കാലം നടപ്പിലാക്കില്ലെന്ന് ഭരണകൂടം ഹൈക്കോടതിയെ അറിയിച്ചു. ഇനി ഒരു പുതിയ അറിയിപ്പ് ഉണ്ടാകുന്നത് വരെ ഈ നിയന്ത്രണം പ്രാബല്യത്തിൽ വരില്ല. ചീഫ് ജസ്റ്റിസ് സൗമെൻ സെൻ, ജസ്റ്റിസ് വി.എം. ശ്യാംകുമാർ എന്നിവരടങ്ങിയ ഡിവിഷൻ ബെഞ്ചാണ് കേസ് പരിഗണിച്ചത്.(Vehicle restriction order in Lakshadweep will not be implemented for the time being)
ഫെബ്രുവരി 25 മുതൽ നടപ്പിലാക്കാൻ നിശ്ചയിച്ചിരുന്ന ഈ ഉത്തരവ്, ആരോഗ്യ സംരക്ഷണവും പരിസ്ഥിതി സൗഹൃദ ജീവിതശൈലിയും പ്രോത്സാഹിപ്പിക്കാനാണെന്ന് ഭരണകൂടം നേരത്തെ വ്യക്തമാക്കിയിരുന്നു. റംസാൻ കാലയളവ് അവസാനിക്കുന്നത് വരെ നിയന്ത്രണം ഉണ്ടാവില്ലെന്ന് നേരത്തെ സിംഗിൾ ബെഞ്ചിനെ അറിയിച്ചിരുന്നുവെങ്കിലും, ഇപ്പോൾ പുതിയ അറിയിപ്പ് ഉണ്ടാകുന്നത് വരെ ഉത്തരവ് നടപ്പിലാക്കില്ലെന്ന് ഡിവിഷൻ ബെഞ്ചിന് ഉറപ്പ് നൽകി.
ഉത്തരവ് ലംഘിക്കുന്നവർക്ക് നിശ്ചയിച്ചിരുന്ന 500 രൂപ പിഴയും ഇതോടെ തൽക്കാലം ഇല്ലാതായി. വാഹന നിയന്ത്രണമെന്ന ആശയം നല്ലതാണെങ്കിലും, ബുധനാഴ്ച പോലുള്ള ഒരു പ്രവൃത്തിദിവസം ഇതിനായി തിരഞ്ഞെടുത്തതിനെ കോടതി ചോദ്യം ചെയ്തു. പ്രവൃത്തിദിവസത്തിന് പകരം മറ്റൊരു ദിവസം പരിഗണിച്ചുകൂടേ എന്ന് ആരാഞ്ഞ കോടതി, ഇതിനായി പുതിയ നിർദ്ദേശങ്ങൾ സമർപ്പിക്കാൻ ഭരണകൂടത്തിന് സമയം നൽകി. വിഷയത്തിൽ വിശദമായ സത്യവാങ്മൂലം സമർപ്പിക്കാൻ കോടതി ഭരണകൂടത്തിന് നിർദ്ദേശം നൽകിയിട്ടുണ്ട്. ഹർജി മാർച്ച് 19-ന് വീണ്ടും പരിഗണിക്കും.
