കണ്ണൂർ: പ്രതിപക്ഷ നേതാവ് വി.ഡി. സതീശന്റെ രാഷ്ട്രീയ നിലപാടുകളെയടക്കം അതിശക്തമായ ഭാഷയിൽ വിമർശിച്ച് എം.വി. ജയരാജൻ. പുനർജ്ജനി പദ്ധതിയിലെ ക്രമക്കേടുകൾ ചൂണ്ടിക്കാട്ടിയായിരുന്നു അദ്ദേഹത്തിന്റെ പരിഹാസം.(VD Satheesan has skin stronger than a rhinoceros, says MV Jayarajan)
സതീശന് കാണ്ടാമൃഗത്തേക്കാൾ ചർമ്മബലമാണെന്ന് അദ്ദേഹം പറഞ്ഞു. സതീശനിട്ട കല്ലിനോട് ശുനകന് പോലും താൽപ്പര്യമില്ല എന്നും, 2006-ലും 2011-ലും പറവൂരിൽ ബിജെപി വോട്ട് സതീശനാണ് ലഭിച്ചത് എന്നും അദ്ദേഹം ആരോപിച്ചു. ധർമ്മടത്ത് ബിജെപി വോട്ട് കൂടുമ്പോൾ പറവൂരിൽ വോട്ട് കുറയുന്നത് കോൺഗ്രസ്-ബിജെപി അന്തർധാരയ്ക്ക് തെളിവാണ്. പിണറായി വിജയൻ ആർഎസ്എസ് വോട്ട് വാങ്ങിയാണ് ജയിച്ചതെന്ന ആരോപണം അടിസ്ഥാനരഹിതമാണെന്നും അദ്ദേഹം കൂട്ടിച്ചേർത്തു.
വയനാട്ടിലെ ദുരിതബാധിതരുടെ പുനരധിവാസത്തിനായി കോൺഗ്രസ് കണ്ടെത്തിയ സ്ഥലം വന്യമൃഗശല്യം രൂക്ഷമായ ഇടമാണ്. "കക്കുക, മുക്കുക" എന്നതാണ് കോൺഗ്രസ് രീതിയെന്നും പുനർജ്ജനി പദ്ധതിയെ സൂചിപ്പിച്ച് അദ്ദേഹം പരിഹസിച്ചു. സിപിഎം വിട്ട് കോൺഗ്രസിൽ ചേർന്ന മുൻ എംഎൽഎ ഐഷ പോറ്റിക്കെതിരെ പാർട്ടി ജില്ലാ കമ്മിറ്റിയും എം.വി. ജയരാജനും ഒരേപോലെ വിമർശനമുയർത്തി.
ഐഷ പോറ്റിയെ എല്ലാ പദവികളിലും എത്തിച്ചത് കമ്മ്യൂണിസ്റ്റ് പാർട്ടിയാണ്. അധികാരം ഇല്ലാത്തപ്പോൾ പാർട്ടി വിട്ടുപോകുന്നത് ദൗർഭാഗ്യകരമാണ് എന്നാണ് എം വി ജയരാജൻ പറഞ്ഞത്. ഐഷ പോറ്റിയുടെ നടപടി ശുദ്ധ അവസരവാദമാണ് എന്നാണ് പാർട്ടി ജില്ലാ കമ്മിറ്റി പ്രതികരിച്ചത്. കഴിഞ്ഞ നിയമസഭാ തിരഞ്ഞെടുപ്പിന് ശേഷം അവർ പാർട്ടിയിൽ സജീവമായിരുന്നില്ല. ഏത് സാഹചര്യത്തിലാണ് അവർ കോൺഗ്രസിലേക്ക് പോയതെന്ന് മനസ്സിലാകുന്നില്ലെന്നും ജില്ലാ കമ്മിറ്റി വാർത്താക്കുറിപ്പിൽ അറിയിച്ചു.