തിരുവനന്തപുരം: നിയമസഭാ തിരഞ്ഞെടുപ്പിൽ വി.എം. സുധീരൻ സ്ഥാനാർത്ഥിയായേക്കുമെന്ന വാർത്തകൾ അടിസ്ഥാനരഹിതമാണെന്ന് അദ്ദേഹം വ്യക്തമാക്കി. പാർലമെന്ററി രാഷ്ട്രീയത്തിൽ നിന്ന് വർഷങ്ങൾക്ക് മുൻപ് പിന്മാറിയതാണെന്നും ആ തീരുമാനത്തിൽ മാറ്റമില്ലെന്നും അദ്ദേഹം ഫേസ്ബുക്കിൽ കുറിച്ചു.
ഫേസ്ബുക്ക് പോസ്റ്റിന്റെ സംഗ്രഹം:
വർഷങ്ങൾക്ക് മുൻപേ താൻ പാർലമെന്ററി രാഷ്ട്രീയത്തോട് വിടപറഞ്ഞതാണ്. ആ തീരുമാനത്തിൽ ഇന്നും മാറ്റമില്ല. പല തിരഞ്ഞെടുപ്പ് വേളകളിലും പാർട്ടി നേതൃത്വത്തിൽ നിന്ന് മത്സരിക്കാൻ സമ്മർദ്ദമുണ്ടായിരുന്നു. എന്നാൽ നന്ദിപൂർവ്വം ആ ആവശ്യങ്ങൾ നിരസിക്കുകയാണുണ്ടായത്. താൻ മത്സരിക്കുമെന്ന് ഇപ്പോൾ പ്രചരിക്കുന്ന വാർത്തകൾക്ക് യാതൊരു അടിസ്ഥാനവുമില്ലെന്ന് അദ്ദേഹം വ്യക്തമാക്കി.
തിരഞ്ഞെടുപ്പ് അടുത്തിരിക്കെ കോൺഗ്രസ് സ്ഥാനാർത്ഥി നിർണ്ണയ ചർച്ചകൾ സജീവമാകുന്ന ഘട്ടത്തിലാണ് സുധീരൻ തന്റെ നിലപാട് പരസ്യമാക്കിയത്. പാർട്ടിക്കുള്ളിലെ ആഭ്യന്തര പ്രശ്നങ്ങളിലും നയപരമായ കാര്യങ്ങളിലും സുധീരൻ പുലർത്തുന്ന വിട്ടുവീഴ്ചയില്ലാത്ത നിലപാടുകൾ പലപ്പോഴും ചർച്ചയാകാറുണ്ട്.