കണ്ണൂർ: കേരളത്തിന്റെ വികസനത്തിനായി മുഖ്യമന്ത്രി പിണറായി വിജയൻ എൻഡിഎ സഖ്യത്തിൽ ചേരണമെന്ന വിചിത്രമായ നിർദ്ദേശവുമായി കേന്ദ്രമന്ത്രി രാംദാസ് അതാവലെ (Ramdas Athawale). കമ്മ്യൂണിസ്റ്റ് പാർട്ടിയും ബിജെപിയും രാഷ്ട്രീയമായ ശത്രുത തുടർന്നോളൂ, പക്ഷേ വികസനത്തിന് രാഷ്ട്രീയം തടസ്സമാകരുത്. പിണറായി വിജയൻ എൻഡിഎയുടെ ഭാഗമായാൽ അത് ചരിത്രപരമായ ഒരു തീരുമാനമായിരിക്കുമെന്നും സംസ്ഥാനത്ത് ഭരണത്തുടർച്ച ഉറപ്പാക്കാൻ ബിജെപി സഖ്യം സഹായിക്കുമെന്നും കണ്ണൂരിൽ അദ്ദേഹം പറഞ്ഞു. വികസന കാര്യങ്ങളിൽ പ്രധാനമന്ത്രി നരേന്ദ്ര മോദിയുമായി കൈകോർത്താൽ കേരളത്തിന് കൂടുതൽ കേന്ദ്ര ഫണ്ട് ലഭിക്കുമെന്നും അതാവലെ കൂട്ടിച്ചേർത്തു.
ഈ പ്രസ്താവന വരുന്നത് കേരളത്തിൽ നിയമസഭാ തിരഞ്ഞെടുപ്പിന്റെ ചൂടുപിടിച്ചു തുടങ്ങുന്ന സമയത്താണ്. ബിജെപി കേന്ദ്ര നേതൃത്വം ഇതിനോടകം തന്നെ കേരളത്തിലെ തിരഞ്ഞെടുപ്പ് പ്രവർത്തനങ്ങൾ ഏകോപിപ്പിക്കാൻ ദേശീയ ജനറൽ സെക്രട്ടറി വിനോദ് താവ്ഡെയെ ചുമതലപ്പെടുത്തിയിട്ടുണ്ട്. തിരുവനന്തപുരം കോർപ്പറേഷനിൽ ഭരണം പിടിച്ചെടുത്തതോടെ കേരളത്തിൽ വലിയൊരു മാറ്റം സാധ്യമാണെന്നാണ് ബിജെപിയുടെ വിശ്വാസം. ബിജെപി ദേശീയ അധ്യക്ഷൻ നിതിൻ നബിന്റെ നേതൃത്വത്തിൽ കേരളത്തിലെ നേതാക്കളുമായി ഡൽഹിയിൽ വെച്ച് ഇതിനോടകം തന്നെ പ്രാഥമിക ചർച്ചകൾ പൂർത്തിയാക്കിയിട്ടുണ്ട്.
പ്രധാനമന്ത്രി നരേന്ദ്ര മോദി ജനുവരി 23 വെള്ളിയാഴ്ച തിരുവനന്തപുരത്ത് എത്തുന്നതോടെ തിരഞ്ഞെടുപ്പ് പ്രചാരണങ്ങൾക്ക് ഔദ്യോഗികമായ തുടക്കമാകും. തിരുവനന്തപുരം കോർപ്പറേഷൻ ഭരണ സാരഥികളെ അഭിനന്ദിക്കാനും നഗരവികസനത്തിനായുള്ള പുതിയ പദ്ധതികൾ പ്രഖ്യാപിക്കാനുമാണ് പ്രധാനമന്ത്രി എത്തുന്നത്. ഇതിനിടയിൽ പിണറായി വിജയനെ എൻഡിഎയിലേക്ക് ക്ഷണിച്ചുകൊണ്ടുള്ള രാംദാസ് അതാവലെയുടെ പ്രസ്താവന രാഷ്ട്രീയ വൃത്തങ്ങളിൽ വലിയ ചർച്ചകൾക്കും പരിഹാസങ്ങൾക്കും വഴി വെച്ചിട്ടുണ്ട്.
Union Minister Ramdas Athawale has sparked a political debate by inviting Kerala CM Pinarayi Vijayan to join the NDA to ensure the state's development and political continuity. Speaking in Kannur, Athawale suggested that a CPM-BJP alliance for governance would be a revolutionary step for Kerala. This statement comes as the BJP gears up for the 2026 assembly elections, with PM Narendra Modi scheduled to visit Thiruvananthapuram on January 23 to celebrate the party's recent victory in the City Corporation.