തിരുവനന്തപുരം: പുതിയ കൗൺസിലർമാർ സത്യപ്രതിജ്ഞ ചെയ്ത് അധികാരമേറ്റതിന് തൊട്ടുപിന്നാലെയാണ് നാടകീയമായ സംഭവങ്ങൾ അരങ്ങേറിയത്. ബിജെപി നേതാക്കളുടെയും പ്രവർത്തകരുടെയും സാന്നിധ്യത്തിലായിരുന്നു ഗാനാലാപനം.സത്യപ്രതിജ്ഞ കഴിഞ്ഞ് മടങ്ങിയ ഉടനെ ഹാളിനുള്ളിൽ ഒത്തുകൂടിയ ബിജെപി പ്രവർത്തകർ ഗണഗീതം ആലപിക്കുകയായിരുന്നു. എൽഡിഎഫ്-യുഡിഎഫ് പ്രവർത്തകർക്കിടയിൽ നിന്നുകൊണ്ടായിരുന്നു ഈ നീക്കം.
ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ, കേരളത്തിന്റെ ചുമതലയുള്ള പ്രകാശ് ജാവദേക്കർ, കുമ്മനം രാജശേഖരൻ തുടങ്ങിയ പ്രമുഖ നേതാക്കൾ ഈ സമയം അവിടെ ഉണ്ടായിരുന്നു.
ബിജെപിയുടെ നടപടി കോർപ്പറേഷനെ വർഗീയവൽക്കരിക്കാനുള്ള നീക്കമാണെന്ന് സിപിഎം കൗൺസിലർമാർ ആരോപിച്ചു.
"കളക്ടറും റിട്ടേണിംഗ് ഓഫീസറും ഇരിക്കെ കൗൺസിൽ ഹാളിനുള്ളിൽ ഇത്തരം പാട്ടും പ്രകടനങ്ങളും നടത്തിയത് തികച്ചും പ്രതിഷേധാർഹമാണ്. ഇത് ബിജെപിയുടെ വർഗീയ അജണ്ടയുടെ ഭാഗമാണ്," എന്ന് സിപിഎം കൗൺസിലർ എസ്.പി. ദീപക് പറഞ്ഞു.
ആലപിക്കുന്ന സമയത്ത് മറുപടിയൊന്നും നൽകാതിരുന്ന കൗൺസിലർമാർ, ചടങ്ങ് കഴിഞ്ഞയുടനെ പരസ്യമായ പ്രതിഷേധവുമായി രംഗത്തെത്തുകയായിരുന്നു. സത്യപ്രതിജ്ഞാ ചടങ്ങിന്റെ പവിത്രത നശിപ്പിക്കുന്ന രീതിയിലാണ് ബിജെപി പെരുമാറിയതെന്നാണ് മറ്റ് കക്ഷികളുടെ ആരോപണം. സംഭവത്തിൽ ഔദ്യോഗികമായി പരാതി നൽകാനാണ് ഇടതുപക്ഷ കൗൺസിലർമാരുടെ നീക്കം.